Progresu Servisu Deklarasaun Rendimentu, Bens no Interese (DRBI)

Iha loron Tersa-Feira (31/05) ohin, Ekipa Responsavel Deklarasaun Rendimentu, Bens no Interese (DRBI) ne’ebé lidera husi Xefe Unidade Inspeksaun no Monitorizasaun Antonino Alves hamutuk ho Espesialista Anti-Korrupsaun (EAK) na’in lima seluk relata progresu servisu DRBI nian durante fulan tolu (3) ba Líder Másimu Comissão Anti-Corrupção (CAC) Komisariu Sergio Hornai hamutuk ho Komisariu Adjuntu Augusto Castro no Adjuntu Luis Sampaio.

Ekipa Responsavel DRBI atualiza evolusaun servisu Deklarasaun Rendimentu, Bens no Interese kona-ba dadus arolamentu deklarante no agregadu familiar ninian no dadus prestadu Sistema DRBI.

Ekipa atualiza dadus arolamentu ba deklarante ho nia membru agregadu familiar nian iha tinan 2021 ho totál hamutuk 22.962 kompostu husi deklarante aroladu hamutuk 5089 (feto 1376, mane 3713), membru agregadu familiar na’in 17.873.

Ekipa rejista deklarante ne’ebé presta sira nia deklarasaun iha Sistema Deklarasaun Rendimentu, Bens no Interese (DRBI) hamutuk deklarante na’in 2053. Deklarante ne’ebé submete ona sira nia formulariu deklarasaun ba ekipa hamutuk na’in 1659, no deklarante sira ne’ebé seidauk submete sira nia deklarasaun hamutuk na’in 394.

Husi dadus deklarante sira ne’ebé mensiona iha leten mai husi totál instituisaun hamutuk 57 kompostu husi PR, PN, MPCM, MAPCOMS, MACLAM, Trade Investment, INCT, IGE, INSS, FDCH, HIV-SIDA, Arquivu no Museum, APORTIL, SERVE, IP, ANC, MPM, MTC, MOP, RTTL-EP, Institutu Bambo, ANAA, MD, BEE TL-EP, EDTL-EP, MPO, ANATL-EP, SEFOPE, IJT, PDHJ, TATOLI-IP, MESCC, AIFAESA-IP, PCIC, MAP, MSSI, MTCI, IPB, AACTL, MAE, IGE IP, SGP, TIMOR GAP-EP, INFORDEPE, SEJD, CLN, ADN-IP, ANPM, CFP, CNC, CI, INDMO, MS, SEKOOP no SEII.

Sorumutu ohin, alende relata progresu Deklarasaun Rendimentu, Bens no Interese (DRBI) ninian, Ekipa Responsavel DRBI mós aprezenta dezafiu balun ne’ebé hasoru durante halo atendimentu ba deklarante sira nia deklarasaun.

Permanent link to this article: https://cac.tl/2022/05/progresu-servisu-deklarasaun-rendimentu-bens-no-interese-drbi/