Patriotizmu Pasadu Timoroan nian mak Pátria ou Morte, Patriotizmu Ohin nian mak Kontra Korrupsaun

Dili – Komisariu Adjuntu Comição Anti-Corrupção (CAC) ba Servisus Asuntu Apóiu no Kooperasaun (SAK) Alexandre Freitas hateten luta Timoroan sira nian patriotismu iha Luta Libertasaun Nasionál pasadu mak “Pátria ou Morte no Mate ka Moris Ukun RasikAn” no patriotizmu Timoroan sira nian iha tempu Ukun Rasik-An mak kontra korrupsaun.

Komisariu Adjunto SAK Alexandre Freitas kasu lia hirak ne’e ba formandus Auditoria Sosiál ba Sosiedade Sivíl no jornalista sira iha Otél Timor bainhira sai oradór prinsipál Segunda-feira (29/11) ohin.

Uluk ita iha ispiritu patriotizmu forte ba luta Libertasaun Nasionál pasadu hodi konkista ona independénsia. Patriotizmu ne’ebé aas liu iha momentu ne’eba mak Pátria ou Morte no Mate Ka Moris Ukun Easik-An”. Agora, iha tempu Ukun Rasik-An daudaun iha governasun nian espiritu Patriotismu iha luta kontra korrupsaun mak aas liu,” Komisariu Adjunto Alex afirma.

Komisariu Adjuntu Alex hatutan teni, Timoroan sira iha tempu luta pasadu komunga palavra de onra “Pátria ou Morte no Mate ka Moris Ukun Rasik-An” ne’ebé ninian kontratasaun sosiál hakerek ho ruin, raan, isin mate no karuun.

Iha tempu Timor-Leste nu’udar nasaun independente katak Komisariu Adjuntu Alex Timoroan sira ninian prinsipiu patriotizmu mak Luta Kontra Korrupsaun hodi oferese justisa moris iguál ba Timoroan hotu la haree ba satus sosiál no afiliasaun politika.

Komisariu Adjuntu Alex motiva mós maluk sosiedade sivíl no jornalista Timorense sira hodi kuda espiritu dedikasaun ho komitmentu forte no sakrifisiu tomak atu hamutuk ho CAC iha forsa (luta) koletiva iha prevene aktus korrupsaun iha rai doben Timor-Leste.

Korrupsaun halo estadu nia osan sai arbiru, sustentabilidade ekonomia lakon, no ne’e fó prejuizu ba estadu iha tempu badak nia laran. Kuandu ita la hamutuk atu kontra ida ne’e, ita sei iha perigu. Ita bele monu ba estadu kleroktokasia. Nune’e mai ita hamutuk luta kombate korrupsaun”, Komisariu Adjuntu Freitas enkoraja. (*)

Permanent link to this article: https://cac.tl/2022/04/patriotizmu-pasadu-timoroan-nian-mak-patria-ou-morte-patriotizmu-ohin-nian-mak-kontra-korrupsaun/