Luis Sampaio “Prevene Di’ak Liu Duke Kura”

Komisariu Adjuntu Comissão Anti Corrupção (CAC) ba Servisu Asuntu Prevensaun no Sensibilizasaun Luis Sampaio hatete, kombate korrupsaun sidadaun hotu-hotu presiza komunga slogan mundiál “prevene di’ak liu, duke kura”. Sidadaun ida idak iha obrigasaun morál hodi prevene-an atu nune’e labele monu ba tentasaun moras korrupsaun iha sira nia moris lor-loron.

Komisariu Adjuntu Sampaio kasu lia hirak ne’e ba partisipante kursu indusaun iha palestra ho tópiku “prevensaun korrupsaun hodi atinje boa governasaun” ne’ebé organiza husi Institutu Nasionál Administrasaun Públika Tersa-Feira (26/04) ohin iha Edifisiu INAP Comoro.

Komisariu Adjuntu Sampaio hatete, korrupsaun nu’udar moras ida perigu liu, hanesan mós ho moras ‘kankru’ no ‘HIV SIDA’ ne’ebé susar atu kura, bainhira moras ne’e da’et kontinua beibeik ba ema nia isin no nia klamar tomak, moras ne’e sei sai króniku hodi lori dezastre boot liu tan ba ema ne’e no tenke hasai osan barak hodi sosa aimoruk hodi kura.

“Iha nasaun sira barak diskursu sira sempre dehan, di’ak liu ita prevene antes, para moras ne’e labele akontese, duke moras ne’e kona tiha mak ita hasai osan ba sosa aimoruk hodi kura. Ne’e ita lakon boot”, Katak Adjuntu Sampaio.

Kombate korrupsaun ba Adjuntu Samapaio úniku solusaun ideál ba estadu mak tenke halo prevensaun. Investigasaun, kondenasaun no hatama ema ba prizaun nu’udar solusaun ne’ebé aumenta prezuizu todan ba estadu.

“Ita tenke fó enfaze boot ba iha prevensaun. Sé ita hakarak husik de’it ema halo korrupsaun, depois ita investiga no halo akuzasaun ba Tribunál no hatama ema sira ne’e ba prizaun. Estadu sei hasai fali gastus seluk, despesa ba ba ema nia hahan lorloron nian para fó han, fó hemu korruptor sira ne’e loron-kalan, no fó asesu ba sabaun, soklin, pepsodent no buat ki’ik sira seluk”, Tenik Adjuntu Sampaio.

“Ne’e gastus mai husi estadu, la’os korruptor sira nia familia mak finansia sira. Di’ak liu, ita fó enfaze ba prevensaun ne’e. Kondena ne’e husik ba opsaun ikus. Ida ne’ebé ideál liu mak prevensaun duke ba prizaun”, Adjuntu Sampaio akresenta. (*)

Permanent link to this article: https://cac.tl/2022/04/luis-sampaio-prevene-diak-liu-duke-kura/