Lider CAC Hala’o Audiénsia Kortezia ho Prezidente Tribunál Rekursu kona-ba DRBI

Dili – Senior Management Comição Anti Corrupção (CAC)’ kompostu husi Komisariu Sergio Hornai akompaña husi Komisariu Adjuntu Investigasaun Augusto Castro, Komisariu Adjuntu Prevensaun no Sensibilizasaun Luis Oliveira Sampaio, Komisariu Adjuntu Servisu Apoiu no Koperasaun Alexandre Freitas, Diretór Apoiu Kooperasaun Luis Ersio Ximenes Guterres no Diretór Prevensaun no Sensibilizasaun Rosario Araujo Tersa-feira (5/10) hala’o audiensia kortezia ho Prezidente Tribunál Rekursu Dr. Deolindo dos Santos iha Edifisiu Tribunál Rekursu Caicoli, Dili.

Objetivu husi sorumutu ne’e diskute, troka imprensaun no buka asertasaun hanoin kona-ba plataforma formulariu deklarasaun rendimentu bens no interese (deklarasaun rikusoin) ne’ebé sei prepara ba implementasaun deklarasaun iha Janeiru tinan 2022.  Sorumutu ne’e fokus diskute kona-ba konteudu husi formulariu deklarasaun no giaun ba embaixador sira ne’ebé halao servisu diplomatiku nian iha estranjeiru.

Liu husi sorumutu ne’e, Komisariu Sergio  husu Prezidente Tribunál Rekursu nia hanoin kona-ba formasaun konjunta balun ne’ebè presiza realiza. Deskute mos oinsá formaliza nota intendimentu atu troka informasaun ba malu iha ámbitu servisu tékniku nian, liu-liu area investigasaun kriminál ninian.

Komisariu Sergio mós informa ba Prezidente Tribunál Rekursu kona-ba esforsu balun ne’ebé CAC halo nu’udar autoridade kompetente ne’ebé simu responsabilidade ba implementasaun deklarasaun rendimentu bens no interese ba membru guvernu, kargu xefia no funsionariu sira.

 “Prosesu balun ita halo tiha ona, hanesan estabelese ekipa ne’ebé atu bele halo atendimentu ba deklarasaun bens servisu no interese ne’e rasik. Hahu ona halo arolamentu ba kargu xefi sira tantu husi intituisaun direta no indireta sira. Ita identifika ona dadus neébé estabelese iha baze de dadus kuaze instituisaun 80 resin mak arola no rejistradu no atu potensialmente presta sira ninian deklarasaun” Komisariu Sergio informa.

Prezidente Tribunál Rekursu, Dr. Deolindo dos Santos iha nia intervensaun preokupa ho kondisaun no dezafiu balun maibé, nafatin esforsu hodi hadi’a no la’o ba oin. Ba kestaun tékniku nian nafatin orienta parte tékniku sira hodi kontaktu malu nune’e bele haree hamutuk no avansa ho kondisaun sira ne’ebé iha. (*)

Permanent link to this article: https://cac.tl/2022/04/lider-cac-halao-audiensia-kortezia-ho-prezidente-tribunal-rekursu-kona-ba-drbi/