Lei MPCC sei Lori Ajénte Estadu no CAC halo Interasaun Regular hodi Prevene Aktus Korrupsaun no Hanorin Ema atu Honestu

Dili- Komisariu Comição Anti Corrupção (CAC) nia Adjuntu Prevensaun no Sensibilizasaun Luis de Oliveira Sampaio, Diretór Prevensaun no Sensibilizasaun Rosario de Araujo, no Espesialista Anti Corrupção (EAK) kontinua sensibiliza Lei Nú 7/2020- Medida Prevenção Combate Corrupção ba dirijente no funsionariu sira iha Institutu Nasionál Saude (INS) Sesta-Feira (8/10) ohin, iha Edifisiu INS Kampung Baru, Dili.

Komisariu Adjuntu Luis de Oliveira Sampaio iha nia intervensaun hatete, Lei MPCC Kapitulu II-Deklarasaun Rendimentu Bens Servisu no Interese sei lori ajénte públiku sira no CAC atu halo interasaun regulár hodi prevene direjente no funsionariu públiku sira hasees no hadook-an husi aktus sira korrupsaun nian.

“Uluk ita boot sira rona, ita ou familia ba CAC, karik ne’e kazu iha ona, ita iha ona problema, indisius, involvimentu. Dalaruma iha sosiedade ne’e, ita hahú kontaktu ho CAC, hanoin ita halo krime ona, maibé nia prosesu ne’e dalas-ba-dalas (etapa-pur-etapa). Agora dadaun lei ne’e obriga ita mezmu la iha kazu, la iha indisius krime ruma, maibé iha futuru, ita sei iha kontaktu regular”, Komisariu Adjuntu hatete.

Ba Adjuntu Luis Sampaio, prevensaun mak di’ak liu, duke hein kazu mak ba hasoru malu. Kondisaun sira nune’e bele rezulta de’it agénte públiku sira no CAC haree malu hanesan fali inimigu.

Ne’e ita hateke malu la hanesan Timor-oan ona, ne’e ita haree malu hanesan inimigu. Lei ida ne’e mai atu prevene ita labele to’o iha faze ida ne’e. Se ita kumpre nia rekezitu sira, dever ne’ebé lei define, ita sei sees-an husi konsekuénsia no rísku potensiál sira”, Komisariu Adjuntu Luis realsa.

Iha sorin seluk, Diretór Prevensaun no Sensibilizasaun Rosario Araujo hatete, lei MPCC hanorin servidór estadu sira atu kuda virtude honestu iha sira nia servisu hodi fó dezenvolvimentu bem estar ba povu no estadu.

Lei ne’e regula ita atu honestu deklara riku soin sira, deklara ho justu, hatete ho lolos, iha uma rua, dehan uma rua, iha ferikoan rua dehan ferikoan rua, humer 10 hatete lolos, servisu iha fatin barak mós hatete lolos. Uluk karik la honestu, agora lei ne’e hanorin ita, pelumenus lori ita atu sai ema ne’ebé honestu iha nasaun ida ne’e”, Diretór Rosario akresenta.

Diretór Rosario mós enkoraja dirijentes no funsionariu sira INS nian atu hatuur prinsipiu Imparsialidade iha funsionamentu administrasaun públiku no kuda valór integridade ida aas, hodi tane no serví estadu ba bem komum humanidade nian.

Eleisaun besik ona, ami fiar imi saude sei la involve barak iha asuntu partidu polítiku, haree lolos de’it servisu saude nian mais profesionais, tanba ita boot sira nia servisu la sukat ba oras. Sabadu no Domingu, ita haree Enfermeiru, Doutór sira iha Ospitál halai ba mai, hakarak halo atendimentu ne’ebé di’ak hodi salva ema nia moris. Maibé sé infermeiru no doutor mak halai ba partidu, nia menus de’it oras ida no rua pasiente bele mate, kulpa boot ba nia, no fó prezuízu ba estadu”, Tenik Diretór Rosario .

Iha oportunidade ne’e Diretór Rosario espresa nia parabens ba funsionariu Saude hotu iha Timor-laran, tanba durante CAC nia servisu ladauk iha ema ruma mak tama kadeia, husi instituisaun ne’e. (*)

Permanent link to this article: https://cac.tl/2022/04/lei-mpcc-sei-lori-ajente-estadu-no-cac-halo-interasaun-regular-hodi-prevene-aktus-korrupsaun-no-hanorin-ema-atu-honestu/