“Lei MPCC La Bandu FP Atu Riku, Naran katak La Kamat Povu nian Osan” ADJUNTU Sampaio

Dili- Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio hatete, Lei Nu. 7/2020-Medidas Prevensaun no Kombate Korrupsaun (MPCC) la bandu ema atu riku. Maibé, lei ne’e eziste atu prevene ajénte públiku sira labele kamat povu nia osan hodi hariku-an lalais.

Adjunto Sampaio esplika katak kualker ajénte públiku ho nível no grau diferente bele riku maibé tenke riku ho fontes ne’ebé loloos, liu-liu tenke justifika ninian fontes bainhira deklara rikusoin mai iha CAC.

“Ita boot sira bainhira deklara rikusoin, tenke halo justifikasaun ida klaru. Riku mai husi inan-aman nia rikeza ka? Joga SDSB mak manan ka? Ka jogus Kasino ka? Ka business mak lori ita boot sai riku matak derepente de’it ne’e? Ne’e tenke justifika ho loloos, sé la justifika, CAC sei tama” katak Adjuntu Sampaio iha ninian aprezentasaun Lei Nú 7/2020-MPCC ba kargu xefia no funsionáriu Ministériu Saude Tersa-Feira (1/3) ohin iha Edifisiu Palasiu Sinzas, Caicoli Dili.

Adjuntu Sampaio subliña “Ululuk ne’e, ita sei hafuhu malu lai. Agora ne’e lae, CAC deskunfia de’it ita boot nia rendimentu no despeza sira la iha balansu, ida ne’e sei loke dalan ba CAC atu intervein,” Adjunto Sampaio esplika.

Adjuntu Sampaio afirma katak, Lei MPCC iha kapitulu II kona-ba deklarasaun rendimentu bens no interese nia finalidade loloos ho objetivu prinsipál mak atu deteta no prevene konflitu interese ajénte públiku sira, no monitoriza mudansa rikusoin ne’ebé sujeita ba deklarasaun ne’ebé aumentu signifikativu no injustifikada.

Instrumentu ida ne’e katak Adjuntu Luis, iha rai seluk uza mós atu hametin konfiansa públiku nian ba servidór estadu sira, no atu proteje ajénte públiku sira husi alegasaun fálsu. Tanba tuir persepsaun públiku nia haree, administrasaun públiku ne’e buradu no korruptu hotu, maibé de faktu la’os hanesan ne’e.

Lei ida ne’e mai atu proteze ita ajénte públiku husi alegasaun falsa sira ne’e. Mezmu lei ne’e mai soke oituan ita, liu-liu ita nia privasidade, maibé nia di’ak mak proteje ita husi stigma sosiál ka persepsaun aat sira husi públiku nian katak, ema hotu liman lais, matan naklosu ba osan estadu nian”, Adjuntu Luis akresenta. (*)

Permanent link to this article: https://cac.tl/2022/04/lei-mpcc-la-bandu-fp-atu-riku-naran-katak-la-kamat-povu-nian-osan-adjuntu-sampaio/