Komisariu Sergio Lidera Sorumutu ho Lideransa Operadores Implementasaun Programa Sesta Bázika Tinan 2022

Iha loron Sesta-feira (22/4) ne’e, Komisariu Comissão Anti-Corrupção (CAC) Sergio Hornai lidera sorumutu cordial ida ho lideransa operadores implementasaun Programa Sesta Bázika; SECOOP, MTCI no MAP sira hodi koalia kona-ba asegura ho transparansia, akuntabilidade no halo justisa social ida diak ba sustenibilidade vida moris no rekoperasaun ekonomia povu TL nian iha situasaun difisil tempu ohin loron nian ba implementasaun programa ne iha tinan 2022.

Marka prezensa mós iha sorumutu ne’e instituisaun nakait sira ne’ebé hala’o knaar halo monitorizasaun ba implementasaun programa SB nian Alfandega, AIFAESA husi instituisaun Estadu no Sosiedade Sivíl; FONGTIL, JSMP, CEPAD no Tane Konsumidor.

Objetivu sorumutu loron ohin atu promove no aserta hodi oinsa instituisaun públiku no sosiedade sivíl bele hakat ba oin ho programa SB hodi benefisia benefisiaria sira iha tinan 2022 tomak ne’ebé bele hahu fulan Abril to’o fulan Dezembru tinan ne’e.

Programa Sesta Bázika iha VIII Governu Konstitusional ida ne’e programa primadona ne’ebé Governu lidera husi Primeiru Ministru Jeneral Taur Matan Ruak halo hodi hasoru krize mundiál Pandemia COVID-19 iha inisiu tinan 2020 to’o agora tama ba iha krize ekonomia tamba invazaun brutalidade no kruel Russia ba rai Ukraina iha loron 24 Fulan Fevereiru 2022 ne’e.

Hahú inisiu krize pandemia COVID-19, Estadu no Governu buka maneira hotu hodi estabiliza ekonomia povu Timor-Leste nian atu nune’e Timoroan sira hotu iha sentidu partensia ba Estadu no ukun nain iha atu solusiona ba halerik sira.

CAC halo parte importante iha ezekusaun Programa SB ne’e hodi halo monitorizasaun husi inisiu to’o agora.

Bainhira VIII Governu Konstitusionál lidera husi Jeneral Taur Matan Ruak hatu’ur polítika atu implementa subsidiu ba agregadu familia sira, iha lamentasaun lubuk ida tantu husi públiku no Parlamenu Nasionál.

Públiku nia preokupasaun boot, oinsa mak asegura polítika ne’ebé governu introdus hela ba povu nian no asegura utilizasaun rekursu sira estadu nian ho prudente, efisiente no efikasia.

Lementasaun hirak ne’e inklui sira-nia ezijénsia boot ba CAC atu tau-matan ba prosesu implementasaun polítika ne’ebé deside ona husi Governu.

Ezijénsia ne’e kabe duni ba iha kompeténsia CAC nian hanesan hatuur hela ona iha Lei Nú. 8/2009 kona-ba Kriasaun CAC, define katak Komisaun nia misaun mak halo asaun prevensaun atu hases tiha dezigualidade no hametin ida ne’ebé efikasia, buka forma sira atu labele iha desviu ba rekursu sira públiku nian ba finalidade ida ne’ebé laloos.

Aleinde ne’e, haklot forma sira ba oferta osan ka kualker bem materiál hodi hetan vantajem ruma liu husi prosesu sira ho forma sira la-hó apropriadu no ilejítimu, prevene aseitasaun ba gratifikasaun sira para hili empreza ne’ebé presta servisu sira fa’an produtu sira ba Governu.

Bazeia kompeténsia ne’ebé Lei atribui ba CAC partikularmente iha artigu 50 Lei Kriasaun CAC nian, iha materia prevensaun kriminal, komisaun iha kompetensia atu; halibur (rekolla) no análiza informasaun hirak ne’ebé relasionadu ho kauza sira ba korrupsaun nian, fó hanoin (akonsella) kualker instituisaun ka entidade públika kona-ba oinsa prevene no luta hasoru hahalok korrupsaun.

Hodi hala’o knaar ida-ne’e, Dekretu Lei Nú. 23/2015, artigu 9 atribui kompeténsia ba Unidade Inspesaun no Monitorizasaun hodi halo monitorizasaun situasaun sira indikadu korrupsaun iha administrasaun direita no indireta Estadu nian, inklui jestaun iha setor públiku imprezarial, ne’ebé bele fó ameasa ba integridade governasaun di’ak.

Reflete ba kompeténsia ne’ebé mak lei atribui, objetivu husi atividade monitorizasaun no inspensaun ne’e atu:

1) Hala’o asaun sira nesesariu hodi prevene risku korrupsaun,

2) Rekolla informasaun sira ne’ebé iha indisiu korrupsaun liga ho polítika sira governu nian, liuliu iha polítika sesta-báziku,

3) Produs rekomendasaun sira ba entidade kompetente hodi hadi’ak jestaun ba distribuisaun rekursu sira estadu nian ne’ebé justu ba benefisiariu sira tuir lei haruka.

Programa Sesta Bázika nu’udar forma ida Estadu foti hodi solusiona problema eknomia iha ambiente pandemia COVID-19 no krizi Mundia agora mak Governu oferta programa SB ne’ebé atribui tiha ona ba povu TL iha tinan kotuk no sei kontinua atribui programa hanesan iha tinan ne’e.

Tinan 2022, Governu atribui $80 milloens atu hamenus sofrementu povu TL nian iha krizi mundial ida ne’e hodi atribui moris diak, nutrisaun diak ba povu doben TL liu husi programa SB.

Komisariu CAC Sergio Hornai husu ba operadores prograa SB nian MTCI no SECOOP atu hakruk deit ba lei aprovizionamentu nian no evita mais pozivel konflitu interese nian.

“Servisu aprovizionamentu ninian ofisial sira labele ariska ita boot sira ninian personalidade pesoal ba iha situasaun ida ne’ebé konflitu interese ninian,” Katak Komisariu Sergio iha ninian intervensaun. (*)

Permanent link to this article: https://cac.tl/2022/04/komisariu-sergio-lidera-sorumutu-ho-lideransa-operadores-implementasaun-programa-sesta-bazika-tinan-2022/