Étika ho Morál Dalan Efetivu Timoroan sira nian iha Luta Kontra Korrupsaun

Betano – Komisariu Adjuntu Comissão Anti-Corrupção (CAC) ba Asuntu Prevensaun no Sesibilizasaun Luis de Olveira Sampaio hatete, prevene no kombate korrupsaun iha nasaun joven Timor-Leste (TL) Timoroan sira liu-liu jerasaun kontinuador husi kampus iha nível edukasaun ensinu superior tenke konsiensializa ida-idak nia-an iha prinsipiu, étika no morál nian.

Atu minimiza korrupsaun iha ita nia rain mak tenke refleta ita nia-an ba prinsipiu sira étika no morál nian hanesan; integridade, onestidade, responsabilidade no akuntabilidade”, Katak Adjuntu Luis ba korpu dosente no universitariu sira iha kampus IPB Betano, Kinta-Feira (18/11) bainhira sensibiliza lei nú 8/2009-Kriasaun CAC no Lei Nú 7/2020-MPCC.

Se Timoroan ida-idak katak Luis Sampaio esforsu muda ninia-an, no hatu’ur-an ho valór integridade ida aas, onestidade no konsiensializadu ona! Lalais no neineik Timoroan hotu sei bele kombate krime korrupsaun iha rai doben Timor-Leste.

Adjuntu Sampaio subliña liu tan katak, dosente no manorin sira iha Timor laran tomak bainhira hanorin matéria étika no morál nian iha kampus tenke pro-ativu liu-tan hodi tranzmite no konsiensializa universitariu sira relativammente ho materia sira kona-ba kombate korrupsaun ninian.

Dosente sira iha étika no morál nian tenke pro-ativu liu tan hodi konsiensializa estudante sira nia konsiensia ba kombate krime korrupsaun labele hein de’it husi CAC”, Katak Adjuntu Luis.

Iha fatin hanesan ba universitariu IPB sira Diretor Prevensaun no Sensibilizasaun Rosario Araujo dezafia komitmentu universitariu sira nian atu hamriik kontribui iha luta prevene no kombate korrupsaun hodi bele lori mudansa signifikativu iha emansipasaun sosiedade Timoroan nian.

Kombate korrupsaun presiza lian boot. Se universitariu sira lian neineik mehi ba kombate korrupsaun ne’e sei han tinan naruk”, Diretór Rosario realsa. (*)

Permanent link to this article: https://cac.tl/2022/04/etika-ho-moral-dalan-efetivu-timoroan-sira-nian-iha-luta-kontra-korrupsaun/