Ekipa Tékniku CAC-TIC Diskute Esbosu Formulariu Dizitál DRBI iha Salaun JP Comoro

Dili- Senior Management Comissão Anti-Corrupção (CAC) lideradu Komisariu Dr. Sérgio Hornai hamutuk ho Komisariu Adjuntu na’in tolu; Dr. Augusto Castro, Dr. Luis de Oliveira Sampaio no Dr. Alexandre Freitas konvoka workshop diskusaun konjunta ida ho ekipa tekniku husi CAC no Tecnologia Informação e Comunicação (TIC) Timor nian durante loron ida kona-ba Esbosu Formulariu Dizitál ba Deklarasaun Rendimentu, Bens Servisu no Interese (DRBI) iha loron Tersa-feira (12/10) iha Salaun João Paulo Comoro Dili.

Diskusaun ida ne’e nu’udar sorumutu ba dala tolu entre CAC ho TIC nian ne’ebé organiza husi ekipa CAC no fokus diskute kona-ba dezenvole sistema formulariu dizitalizasaun ho ninian estrutura no formatu ne’ebé TIC dezenvolve hela iha sistema hodi aprezenta mai iha CAC.

CAC instituisaun kompetente ne’ebé inisia esbosu konteudu no autoridade implementador sistema deklarasaun rendimentu, bens servisu no interese nian durante loron ida diskute ativamente iha workshop ne’e hodi ajusta ideas, rekomendasaun sira ho metas atu hametin liu-tan lasu kooperasaun instituisaun Estadu CAC no TIC iha futuru.

Komisariu Hornai hateten servisu hamutuk entre TIC no CAC sei rezulta finalidade ida oinsá bele estabelese sistema ida konsolidadu, integradu, no evita ba esesu rískus sira ne’ebé iha nia probabilidade no pesoál irresponsavel sira atu penetra tama iha sistema laran.

Ita iha ona instituisaun preferénsia hanesan TIC, Autoridade Ajénsia Informasaun Teknolojia, ita buka esforsu sira hotu-hotu oinsá mak ita bele halibur rekursu sira atu bele hametin sistema sira liu-liu ba iha informasaun no teknolojia ninian”, Katak Komisariu Sergio ihan inian intervensaun.

Komisariu Sergio hatutan teni, hafoin Lei Nú 7/2020 MPCC entrada em vigór iha loron 26 fulan Agostu 2020, kontinua ho ninian efetividade iha 20 fevereiru 2021. Nune’e, CAC nu’udar autoridade kompetente haree katak importante no pertinente halo medidas sira urjente hodi bele hakbiit Espesialista Anti-Korrupsaun (EAK) bainhira implementa.

Atu implementa presiza kbiit no koñesimentu EAK sira nian ida natoon kona-ba informasaun no teknolojia hodi nune’e bele asegura deklarantes deklarasaun rendimentu, bens no interese en termus seguransa jurídika,” Komisariu Sergio realsa.

Diskusaun durante loron ida ne’e, ekipa rua konkorda ho esbosu ne’ebé dezenvolve dadaun no konsidera nu’udar matadalan ida hodi gia diskusaun profundu iha futuru. Diskusaun tuir mai tékniku instituisaun rua nian sei halo análiza kualidade konteudu deklarasaun nian.

Diskusaun tuir mai ekipa rua sei fokus deskute kona-ba ekipa husi DRBI (Deklarasaun Rendimentu, Bens no Interese) nian sei halibur informasaun no ninian konteudu sira tuir lei MPCC. Ho diskusaun ne’e, ekipa rua bele halo ajustamentu ba esbosu formulariu ne’ebé iha ona hodi aselera finalizasaun formulariu eletróniku nian.

Oportunidade diskusaun loron ida ne’e Senior Management CAC unanimous hato’o apresiasaun ba servisu konjunta instituisaun rua CAC ho TIC ne’ebé hatudu vontade no inisiativa sira di’ak ba sevisu interese estadu ninian iha implementasaun Lei MPCC. (*)

Permanent link to this article: https://cac.tl/2022/04/ekipa-tekniku-cac-tic-diskute-esbosu-formulariu-dizital-drbi-iha-salaun-jp-comoro/