CAC Partilla Rezultadu Inspeksaun Projetu Liña Eletrisidade iha Suku Leotela- Liquiça ba Dirijente EDTL, EP no Husu atu Halo Re-Inspeksaun

Dili- Comição Anti Corrupção (CAC) nia Komisariu Adjuntu Prevensaun no Sensibilizasaun Dr. Luis de Oliveira Sampaio akompaña husi Diretór Jerál Prevensaun no Sensibilizasaun, no Diretór Nasionál ba Inspesaun no Monitorizasaun, Diretór Estadu Avaliasaun Rísku no Espesialista Anti Korrupsaun (EAK), CAC, iha Kuarta-feira (06/10) ne’e hala’o sorumutu ba sesaun partilla no akonsellamentu ho Prezidente Konsellu Administrasaun EDTL, Ep ho nia Ekipa.

Sorumutu ne’ebé hala’o iha salaun reuniaun EDTL, Colmera, Dili- ne’e ho objetivu atu aprezenta dadus rezultadu monitorizasaun no inspeksaun ba projetu dada liña eletrisidade iha Suku Leotela, Postu Administrativu Liquicça-Vila, Munisipiu Liquiça.

Komisariu Adjuntu ho ekipa akonsella no rekomenda Ekipa EDTL, EP atu halo re-inspeksaun fila-fali bazeia ba dadus ne’ebé CAC rekolla ona, hafoin hetan reklamasaun husi komunidade balun iha Suku Leotela.

Komisariu Adjuntu esplika no subliña ba Prezidente EDTL, EP ho nia ekipa Lei Nú. 8/2009, 15 jullu Kriasaun Comição Anti Corrupção, artigu 5 (1), defini katak, iha matéria prevensaun nian Komisaun iha kompetensia atu a) rekolla no analiza informasaun kona-ba kauza sira ba prevensaun korrupsaun; b) hala’o asaun konsensializasaun públiku ho objetivu atu limita aktu korrupsaun liuhusi motiva ema atu halo medidas prevensaun ka redus aktus sira ne’ebé fó-fatin ba akontese krime korrupsaun; c) akonsella instituisaun públiku ka autoridade públiku sira kona-ba oinsa prevene no kombate korrupsaun.

Nune’e CAC la’os haree de’it kona-ba investigasaun, maibé servisu boot liu ne’ebé CAC halo ida mak prevensaun, iha ne’ebé nia vantagem boot liu atu salva ajénte públiku sira labele monu ba rísku korupsaun no salva rekursu estadu atu prevene estadu hetan prejuízu.

Komisariu Adjuntu Luis esplika, dadus ne’ebé Komisaun rekolla bele iha implikasaun jurídiku ba krime, bainhira rezultadu ne’ebé Komisaun aprezenta la hetan konsiderasaun no rezulta Estadu hetan prejuízo.

Tan ne’e, CAC fó énfaze ba servisu prevensaun. Husi informasaun sira tama no bazeia ba kompeténsia ne’ebé CAC iha, CAC lori informasaun sira ne’e hodi diskute no mós prevene risku ho nia konsekuensia potensial sira.

Tuir lolos ne’e ami husik hela ba, depois iha prejuizu ona ba estadu mak ami buka tuir de’it. Ita lakoi atu prátika ne’e kontinua la’o. Ne’e ita la ajuda ita nia estadu, depois ne’e osan lakon tiha, rekursu ne’e ita gasta saugati de’it, projetu la atinje nia objetivu, ita hanoin de’it lori ema ba prizaun. Prizaun ne’e gasta tan osan estadu, entaun ita halo esforsu hotu hodi prevene, ne’e labele akontese”, Komisariu Adjuntu Luis akonsella.

Prezidente Konsellu Administrasaun EDTL, Ep espresa nia hanoin hodi apresia Comição Anti Corrupção ne’ebé ho fuan boot partilla informasaun ba EDTL, Ep no akonsella hodi hamutuk prevene aktus sira ne’ebé bele hamosu krime korrupsaun nian.

Prezidente EDTL, EP ho nia ekipa espresa mós sira nia prontidaun atu kolabora hodi halo re- inspeksaun ba projetu alargamentu liña eletrisidade iha fatin refere, no sei aprezenta hikas mai Comição Anti Corrupção bainhira inspensaun termina.

Iha sorumutu ne’e, CAC no Direjente EDTL, EP konkorda atu hametin liu-tan liña kordenasaun servisu iha futuru hodi prevene korrupsaun partikularmente iha EDTL, ne’ebé foin tranforma ba empreza públiku iha Janeiru 2021.

Permanent link to this article: https://cac.tl/2022/04/cac-partilla-rezultadu-inspeksaun-projetu-lina-eletrisidade-iha-suku-leotela-liquica-ba-dirijente-edtl-ep-no-husu-atu-halo-re-inspeksaun/