Featured Stories

Hakarak ka Lakohi Servidor Povu Kargu Chefias too PR Tenki Deklara Rikusoi

by

Dili – Komisariu Commissão Anti Corrupçao (CAC) Dr. Sergio Hornai hateten hakarak ka lakohi servidor Estadu sira ne’ebé assume kargu chefia husi Chefe Departamentu too ba iha Prezidenti Republika (PR) tuir lei foun Nu. 7/2020 Medidas Prevensaun no Kombate Korrupsaun (MPCC) obrigado tenki deklara sira ninian Rendimentus, Bens no Intereses ka rikusoi ba iha Komisaun wainhira diploma foun ne’e implementa iha tinan 2021 oin mai.

“Hakarak ka lakohi funsionariu Estadu ne’ebé assume kargu husi nivel Chefe Departamentu too ba iha Prezidenti Republika tenki deklara rendimentus, bens e intereses. CAC iha kbiit no rekursu atu halo ida ne’e tuir planu Komisaun nian,” katak Komisariu Sergio iha ninian intervensaun wainhira sai orador principal iha Round Table Discussion loron sorin ne’ebé organiza husi The International Republican Institute (IRI) ho FONGTIL Kuarta-feira (14/10) ohin iha Salaun Reuniaun Cruz Vermelha TL, Bairo Formosa Dili.  

Paper ne’ebé Komisariu aprezenta iha Diskusaun Meja Redonda ne’e mak “Mekanismu no Planu Assaun Relasiona Oinsa Atu Hakbit Esforsu sira Hodi Kombate Korrupsaun iha TL” tuir lei MPCC. Diskusaun Meja Redonda ne’e aprezenta orador nain tolu (3); Komisariu CAC, Prezidenti Komisaun A Parlamentu Nasional (PN) Deputadu Dr. Joaquim “Boraluli” dos Santos, Diretor Ezekutivu AJAR Dr. José Luis de Oliveira no modera husi Prezidenti Konselhu Imprensa (CI) Dr. Gil “Alturas” Guterres.

Komisariu Sergio Hornai hatutan teni hafoin servidor povu sira deklara sira nian rendimentu, bens no interese, Espesialista Anti-Korrupsaun (EAK) sei akompanha no monitoriza regularmente rikusoi servidor povu sira nian annualmente durante simu mandatu kargu chefia.

Komisaun katak Komisariu Sergio sei akompanha ho rigorozu no kuidadozu tebes deklarantes sira ninian deklarasaun bens no interese inkluindu agregadu familiar sira “Hanesan deklarante ida haruka ninian oan ba eskola iha rai liur! Fundus mai husi nebe? Obrigado tenki deklara fontes orsamentu,” Komisariu Sergio afirma.

Komisariu Sergio husu ba entidades hotu iha obrigasaun atu kolabora, presija persepsaun, artikulasaun kolektiva ho Komisaun hodi implementa Lei foun MPCC ne’e iha luta Timoroan hotu nian kontra korrupsaun.

Komisaun katak Komisariu Sergio oras ne’e halao ejersisiu internal ho intensive hodi prepara planu, maneira no formatu atu implementa diploma foun ida ne’e liu-liu konaba implementasaun Lei Nu. 7/2020 Kapitulu II do REGIME DECLARAÇÃO DE RENDIMENTOS, BENS E INTERESES artigu 27 too artigu 58.

“Komisaun iha kbiit atu implementa ida ne’e tuir planu no CAC sei halo supervizaun iha ne’ebé kuandu iha aumentu signifikativu deklarantes tenki justifika mai Komisaun. Autoridade sira seluk tenki kolabora. Se la kolabora sei iha konsekuensia punisaun administrative no kriminalidade,” Komisariu Sergio sublinha. (*)

Previous postRekrutamentu SWP Australia nian La Tuir Mekanismu, CAC, CFP no PDHJ Halo Intevensaun iha SEPFOPE Next postSenior Management CAC no EAK Tomak Tuir Formasaun Lei MPCC

Popular

Hakarak ka Lakohi Servidor Povu Kargu Chefias too PR Tenki Deklara Rikusoi