Dili – Iha loron Kinta-feira (7/11) ekipa Comissão Anti-Corrupção (CAC) lidera husi Diretór Servisus Apoiu no Kooperasaun Carlos Bento Maubere halao sorumutu kortejia ida ho Ministru Reforma Lejislativa no Asunto Parlamentar Fidelis Magalhães iha Salaun enkontru Ministru Reforma Lejislativa Palacio Governo Dili.

Objetivu husi enkontru ne’e koalia sobre servisu Komisaun nian iha tinan 2018 no servisu konjunto entre CAC, governu ho United Nations Development Program (UNDP) nudar preparasaun ba wokshop Nasional kona-ba United Nations Convention Against Corruption (UNCAC) no Ezbozu Lei Anti Korrupsaun ne’ebé sei halao iha fulan Novembru.

Sorumutu kortejia ne’e koalia sobre implementasaun Konvensaun Nasaun Unidas Kontra Korrupsaun (UNCAC) liga Kapitulo II kona-ba Medidas preventivas ba Korrupsaun no Kapitulu V konaba Rekoperasaun Ativos/Asset Recovery no Konferensia Nasional kona-ba “Komprimisu Governu Dawaluk iha Prevene no kombate korrupsaun”. Sorumutu ne’e mos koalia konaba dezenvolve hamutuk Estratejia Nasional Kontra Korrupsaun ne’ebe Ministru Fidelis propoin atu halao iha tinan 2019.

Ministru Fidelis apoiu total servisu CAC nian no sai prioridade programa governu atu assegura boa governasaun nudar komprimisu politiku Primeiru Minstru Taur Matan Ruak nian.

Sorumutu ne’e partisipa husi Diretór Investigasaun, Augusto Castro, Chefi Kooperasaun João Correia, Pontu Fokal Timor-Leste ba Self-Assessment UNCAC nian Alexandre Faustino Freitas no Ofisial Gabineti Komisariu Afonso de Deus. (*)