Dili –Ekipa Comissão Anti-Corrupção (CAC) lidera hosi eis-Sekretariu Ezekutivu CAC Alexandre Freitas kompostu hosi Diretur Investigasaun, Direitur Servisu Apoio no Kooperasaun ho Chefe Unidade balun halao sorumutu ho delegasaun Uniaun Europeia (EU) ba asuntu Boa-Governasaun iha Salaun Sorumutu CAC Farol Dili iha loron Kuarta-feira (15/8).
Objetivu hosi sorumutu ne’e koalia kona-ba oinsa iha posibilidade atu EU bele implementa programa komponente rua (2) hosi Public Finance Modernisation Programme (PFMO) hodi fo apoiu CAC iha futuru.
Programa komponente 2 EU-PFMO nian ne’e lansa tiha ona iha loron 12 Fulan Junho 2018 liu ba iha Hotel Timor. Objetivu husi komponente 2 ne’e atu apoiu dezenvolvimentu sustentavel Timor-Leste atu melhora diak liu tan efikasia, integridade, transparensia no performansia husi orientadu prestasaun servisu publikus nian ba sidadaun hotu nian iha harmonia ho Plano Estratejiku Dezenvolvimentu Nasional (PEDN) 2011 – 2030 nian
CAC nudar instituisaun publiku ida ne’ebé designadu atu sai nudar parseiru ba komponente 2 ne’e. Sorumutu ida ne’e nian sentidu atu hili Pontu Fokal CAC nian nain ida atu ba iha implementasaun EU-PFMO nian. (*)
