Dili – Ohin Sesta-feira (6/7) Comissão Anti-Corrupção (CAC) no Unidade De Informação Financeira (UIF) realiza asinatura memorando entendimento (MoU) ida ho substansia kooperasaun fahe informasaun kona-ba brankamentu kapitais, finansiamentu terrorismu, no krimi korrupsaun iha edifisiu CAC Farol Dili.

Reprezentante CAC asina akordu ne’e mak Komisariu Adérito Pinto Tilman no reprezentante husi UIF mak Diretora Ezekutiva Maria Jose de Jesus Sarmento. Sasin ba asinatura MoU instituisaun Esrado rua ne’e Komisariu Aduntu CAC nain rua Manuel Bucar, Rui Pereira dos Santos no funsionariu instituisaun rua. Objetivu akordu legal ne’e atu instituisaun Estado rua koopera malu hodi fahe informasaun no dadus ba malu ho efektivu bazeia ba Lei No. 17/2011, 28 Dezembro, amandamentu Lei No. 5/2013/III 14 Agosto ne’ebé approva rejimi legal ba prevensaun no luta kontra brankamentu kapitais no finansiamentu terrorismu.

MoU ne’e sei fasilita parte rua iha meloramentu servisu investigasaun kriminal iha CAC. Informasaun sirak ne’ebé UIF sei fornese ba CAC nudar informasaun konfidensial ho objetivu atu haforsa evidensias iha prosesu investigasaun hodi hafasil akuzasaun ba suspeitus husi prokurador sira iha julgamentu.

Akordu ne’e importante atu haforsa Timor-Leste ho mekanismu seguru no efisiente hodi kombate aktividades krminal nian iha teritoriu nasional no mos liu fronteiras. Akordu ne’e mos kobre formasaun konjuntura atu hasae kapasidade ofisial CAC no UIF. (*)