Dili – Komisariu Comissão Anti Corrupção (CAC) Adérito Pinto Tilman hateten ministeriu hotu iha governasaun nasaun doben TimorLeste (TL) la iha ida mak moos no kuaze komete error, mal-administrasaun no irregularidade. Komisariu Tilman kasu lia hirak ne’e wainhira sai orador prinsipal iha seminariu organiza husi PDHJ iha loron Segunda (17/) loraik iha Salaun MSS Caicoli Dili
Komisariu rekomenda atu Inspector General Estado (IGE) halao auditoria ba ministeriu tomak hodi evita erro hanesan iha futuru. Kazu hirak ne’e akontese iha funsaun publika nian ezersisiu, tamba seidauk iha auditoria ida diak kona-ba lalaok servisu ministeriu nian hotu hodi evita aan husi erro korrupsaun.
“Ida ne’e obrigasaun IGE nian hodi halo auditoria atu evita erro hanesan iha ministeriu hotu,” katak Komisariu Tilman iha nian intervensaun.
Komisariu sujere ba MSS no mos ministeriu tomak atu evita koloka funsionariu iha departamentu ida kleur atu evita pratika korrupsaun, liu-liu iha departamentu finansas no aprovizionamentu. Sujere mos ba direitur finansas ho aprovizionamentu atu kontrola no fiskaliza funsionariu sira atu evita monu ba tentasaun korrupsaun.
“Tamba servisu kleur iha fatin finansas ho aprovizionamentu hanesan “lahan basa” sai risku atu funsionariu monu ba iha tentasaun korrupsaun,” Komisariu hatutan teni.
Partisipantes seminariu husi nivel Direitur Jeral, Direitur Nasional, Direitur Rejional, Chefe Departamentus iha MSS hamutuk kuaze nain 30 resin ne’e ho antusiasmu boot partisipa iha aprezentasaun Komisariu nian. Komisariu esplika mos ba servidor povu iha MSS kona-ba servisu CAC nian, dezafius no obstakulus ne’ebé durante ne’e komisaun infrenta iha tinan hitu nian laran.
Seminariu loron ida ba funsionariu Ministeriu Solidaridade Sosial (MSS) organiza husi Provedor Direitus Humanus no Justisa (PDHJ) ho topiku “Prevene no Kombate Korrupsaun, Hodi Promove Governasaun Diak no Proteje Direitus Humanus iha Servisu Administrasaun Públika nian”.
Komisariu iha ninian intervensaun esplika mos ba partisipantes sira kona-ba Lei Anti Korrupsaun (LAK) ne’ebé Komisaun halo ona ninian kontributu no oras ne’e iha ona meja Parlamentu Nasional (PN) atu deskute iha plenaria hodi aprova sai lei.
“Iha Lei Anti Korrupsaun (LAK) mos preve atu servidor Estado husi nivel Chefe Departamentu too ba iha Prezidenti Republika tenki deklara sira ninian rikusoi. Maibe, PN seidauk deskute no iha tempu badak nian laran deputadu sira nian mandatu atu remata ona, entaun LAK sei kaduka. Ida ne’e mak obstakulu ba ita iha luta prevene no kombate korrupsaun,” katak Komisariu Tilman.
Seminariu loron ida ne’e hanesan implementasaun MoU Quadrilateral entre instituisaun Estado nian CAC, PDHJ, CFP no IGE ne’ebé asina iha loron 22 Outobro 2015 liu ba iha salaun MSS Caicoli Dili. (*)
Related
- “Universitariu UNPAZ Tenki Sente Sai Nain ba Estadu TL no Kontribui iha Luta Kontra Korrupsaun” Adjunto Luis
- Diskursu Kompletu Komisariu CAC Dr. Sergio Hornai iha Selebrasaun Decimo Primeiro Anniversario CAC nian iha Auditoriu Kay Rala Xanana Ministeriu Finansas Ai-Tarak Laran Dili iha loron 22 Fevereiru 2021
- Komemora Decimo Primeiro Aniversario, CAC Ofisialmente Lansa Deklarasaun Rikusoi
- Amo Gui “Fiar ba Misaun EAK Halo no Sai Sasin ba Misaun CAC”
- CCC Vasconselos “Sura ho Ami, Ami Prontu Kolabora ho CAC”
- Disemina Lei MPCC, CAC La Hanourin Funsionariu Estadu Hanesan Professor no Instructor