Dili – Comissão Anti-Corrupção (CAC) servisu hamutuk ho GOPAC selebra loron mundial anti korrupsaun iha Timor-Leste (TL) ne’ebé monu iha loronohin 9 fulan Dezembro tinan 2015 ho topiku sentral “Valoriza No Utiliza Rekursu Estadu Ba Povu Nia Moris Diak No Hametin Integridade Estadu”.

Komemorasaun ne’e hatudu TL nia partisipasaun ativu iha kampaña mundial luta kontra korrupsaun no kontinua fo hanoin nafatin papel konjuntu sosiedade tomak no entidade publiku sira ba prevene no kombate korrupsaun.

“Sentidu filozofia husi tema ida ne’e atu fó hanoin nafatin ita hotu katak Bem Estar Povu TL hanesan finalidade ida ne’ebé ita hakarak atinji. Bem Estar Povu TL sei bele atinji wainhira iha Integridade Estadu ne’ebe a’as no servidor estadu no ukun nain sira hatene valoriza no utiliza rekursu estadu ho diak,” Katak Komisariu Adérito Tilman iha nia diskursu.

United Nations Office on Drugs and Crime (UNODC) ne’ebé sai sekretariadu ba administra no implementa Konvensaun Nasoens Unidas Kontra Korrupsaun (UNCAC) foti tema jeral “Hapara Korrupsaun No Subornu, Se Lae Ekonomia No Dezenvolvimentu Sei Destruidu” iha selebrasaun Loron Mundial Kontra-Korrupsaun tinan ne’e.

CAC nafatin bolu nai-ulun Orgaun Estadu nian no sosiedade tomak iha nasaun atu kontinua reflete hamutuk hodi nafatin determina ida-idak nia kompromisu ba luta prevene no kombate korrupsaun iha Timor-Leste.

Atividade ba komemorasaun loron Mundial Kontra Korrupsaun iha TL tinan ne’e CAC-GOPAC realiza Seminário iha Munisípiu Covalima hamutuk  ho Estudante no grupu Joventude, Organisasaun Feto, ONG sira, Konfisoes Religioso sira, Lider komunitariu, Administrador postu-Administrativu, no Administrador Munisípiu no mos ho bainaka sira hosi Dili.

“Atividade ne’e atu hatudu importansia partisipasaun komunidade iha movimentu luta kontra korrupsaun no kampaña ba públiku ne’ebé sei kontinua iha tempu tuir mai,” Katak Komisariu Tilman.

Iha selebrasaun loron importante tinan ne’e, CAC asina Memorandum Intendimentu (MoU) ho Universidade Nasional Timor Lorosa’e (UNTL) no Univerdade Dili (UNDIL).  No mos halo lansamentu Sena Komvustivel Estadu nian iha Estasaun Abastesimentu Mina ETO, AITULA no RUVIC.

Entidades sira ne’ebé envolve iha komemorasaun ne’e mak hanesan : Funsionario Publiku, PNTL, F-FDTL, Confessões Religiosas, Lideranca Partido Politiku, Lideres Komunitariu, Admistrador Postu Administrativu, Komunidade, Estudantes, Sociadade Sivil, Setór Privado, Media local no Nasional, Agencia Internacionais. (*)