Dili – 04/06/2013—Durante sorumutu Implementation Review Group (IGR) ba Konvensaun Nasoens Unidas kontra Korrupsaun (UNCAC) nian ba dala-hat iha Vienna semana kotuk, Estadu Parte Timor-Leste mos partisipa iha sorumutu trilateral hamutuk ho Estadu Parte Libéria no Angola.                                                                          

Iha sorumutu ne’e, CAC reprezenta Timor-Leste hamutuk ho Estadu Parte Liberia nudar nasaun reviewers nebé sei halo avaliasaun/review ba esperiensia implementasaun UNCAC husi Estadu Parte Angola nian.

Iha sorumutu ne’e, Estadu Parte na’in tolu ne’e koalia kona-ba planu no prosesu avaliasaun implementasaun UNCAC iha Angola no preparasaun kona-ba Timor-Leste no Libéria nia vizita ba Angola atu halo avaliasaun no re-avaliasaun direta sekarik nesesáriu. Sorumutu trilateral ne’e Sekretáriadu IRG mak fasilita no halo iha loron-31 fulan-Maiu 2013. Iha fulan balu mai, Angola sei haruka check-list kona-ba sira nia auto-avaliasaun hodi fo ba Timor-Leste no Libéria atu halo apresiasaun no komentariu ba prosesu auto-avaliasaun  ne’e.

Timor-Leste ramata ona nia Auto-Avaliasaun/Self-Assesment Review kona-ba implementasaun UNCAC Kapítulu III kona-ba Kriminalizasaun no Lei no Orden no Kapítulu IV kona-ba Koperasaun Internasional. Sumáriu Ekzekutivu husi Auto-Avaliasaun ne’e publika ona iha fulan Junhu 2012 hamutuk ho Estadu Parte tolu seluk, Jeorjia, Australia no Suisa nia Sumárius.

Komisáriu Adérito ho nia ekipa husi CAC fila hikas mai Timor-Leste iha loron-Sigunda horiseik.