Dili, 22/05 /2012— Iha Kinta semana kotuk, Komisáriu Adjuntus Komisaun Anti-Korrupsaun (CAC) Manuel C.C. Bucar C. Real no José António de Jesus das Neves hasoru malu ho Komisaun A Parlamentu Nasional, diskuti kona-ba forma ekipa trabalhu ka working group ba projetu esbosu lei deklarasaun rikusoin.

Ekipa trabalhu ne’e mosu hafoin liu tiha sorumutu no diskusaun balun liu husi meza redonda entre CAC no Parlamentu Nasional no diretores linhas ministériais iha tinan kotuk no prinsípiu tinan ida ne’e. Ekipa trabalhu ne’e sei kompostu reprezentante sira husi CAC, Parlamentu Nasional Komisaun A no instituisaun relevante seluk hanesan Ministériu Públiku, Provedor Direitus Humanus no Justisa, no Inspeitor Jeral Estadu. Ekipa ne’e mak sei responsabiliza ba halo diskusaun kle’an no sistemátiku to’o hamoris esbosu ba lei deklarasaun rikusoin.

Tuir planu, primeira diskusaun grupu traballu nia ba konseitu deklarasaun rikusoin sei realiza iha loron 6 fulan-Juñu mai, iha Parlamentu Nasional,.

Relasiona ho asuntu anti-korrupsaun, iha sorumutu ne’e mos CAC-Komisaun A koalia kona-ba esbosu lei anti-korrupsaun. Tuir Komisaun A katak bankada parlamentar husi partidu opozisaun sia sira oras ne’e iha hela prosesu atu halo submisaun foun ba esbosu lei-anti korrupsaun nebé mak kaduka iha tinan kotuk. Wainhira halo ona subimisaun mak sei konvida instituisaun relevante sira inkluindu CAC no sosiedade sivil sira atu halo apresiasaun ka audiensia públiku.