Komisariu Aderito de Jesus Soares fo Konferensia Imprensa ba Jornalista Sira--21/02/2013

Dili, 21/2/2013—Ohin dadersan, Komisáriu Komisaun Anti-Korrupsaun Adérito de Jesus Soares halo konferensia imprensa ba jornalista sira iha Dili, nasional no internasional, kona-ba CAC atu selebra nia aniversáriu ba datoluk nebé tuir kalendáriu sei selebra aban Sesta, 22 Fevereiru, 2013 hamutuh ho estudantes universitáriu sira iha Dili laran. Wainhira koalia ba jornalista sira, Komisáriu CAC Adérito Soares louva servisu media nian durante ne’e halo reportajen no kombate korrupsaun iha Timor-Leste.

Wainhira koalia konab-ba selebrasaun aban nian, Komisáriu Adérito Soares hatete katak iha espetativa estudantes hamutuk 1,500 resin mak sei halibur hamutuk iha edifísiu Jináziu Dili hodi komemora aniversáriu CAC ne’e. Distintu konvidadus neba mak konvida atu partisipa iha selebrasaun ne’e inkluindu Prezidente Parlamentu Nasional Vicente Guterres, Ministru Estadu no Prezidente Konseillu Ministrus Hermenegildo Pereira, Bispo Disoseze Dili Don Alberto Ricardo no Ambasador Maláizia ba Timor-Leste.

Parte husi programas selebrasaun aban nian sei aprezenta mos filme dokumentáriu ida kona-ba perfil servisu CAC no palestra no diskusaun badak ida kona-ba papel universitária iha prevene korrupsaun iha Timor-Leste.

CAC nia festa selebrasaun ne’e organiza hamutuk ho Universidade Nasional Timor-Lorosa’e (UNTL).