Dili, 6/11/2012—Komisáriu Anti-Korrupsaun Adérito de Jesus Soares halo sorumutu ho Ministru Negosius Estranjeiru Jose Luis Guterres hodi ko’alia kona-ba Timor-Leste atu sai uma-na’in ba Konferensia Rejional ADB/OECD Anti-Corruption Initiative for Asia and the Pacific nian iha Dili tinan oin. Sorumutu ne’e hala’o ohin dader iha Ministériu Negósiu Estranjeiru no akompaña husi Diretur CAC ba Diresaun Prevensaun Abrão Freitas no Diretora ba Divizaun Multilateral Milena Rangel.
Desizaun kona-ba Timor-Leste atu organiza konferensia rejional ne’e halo durante sorumutu seminar rejional ADB/OECD kona-ba asuntu korrupsaun nian iha Hanoi, Vietnam iha fulan kotuk. Proposta ne’e hato’o husi Komisáriu Adéritu Soares no hetan aprovasaun unanimamente husi Sekretáriadu ADB/OECD nian nomos partisipantes sira husi rejiaun Ázia Pasífiku ne’e, inkluindu Xina, Korea Sul no India.
Proposta Komisáriu CAC nian iha sorumutu rejional ne’e, tuir Ministru Guterres katak ne’e hatudu Timor-Leste nia fiar-aan no komitementu bo’ot nomos hanesan servisu diplomasia diak tebes ida hodi harii no hasa’e tan komunidade internasional nia konfidensia ba Timor-Leste katak nasaun ne’e bele organiza eventu internasional sira hanesan ne’e.
Timor-Leste ofisialmente sai membru ba ADB/OECD Anti-Corruption Initiative for Asia and the Pacific iha tinan 2012 hamutuk ho Solomon Island. Iha 2010, Sekretáriadu ADB/OECD Anti-Corruption Initiative for Asia and the Pacific sira konvida nasaun rua ne’e sai nudar observadores.
Konferensia rejional ne’e tuir kalendáriu sei hala’o iha fulan Juñu ka Jullhu 2013. Konfirmasaun final kona-ba data nian sei determina husi Sekretariadu ADB/OECD nian. Tuir espetativa katak partisipantes liu 50 resin mak sei partisipa husi rejiaun Ázia Pasífiku mak sei partisipa iha konferensia ne’e.
