Dili, 28/9/2012—Iha Tersa semana ne’e, iha Salaun Centro Convenção de Dili, Komisaun Anti-Korrupsaun realiza semináriu ida ho Sekretáriu Estadu Siguransa (SES) kona-ba oinsa minimiza risku no prevene korrupsaun iha área siguransa. Tema semináriu ne’e mak: “Haforsa knar funsionáriu SES no ninia orgaun sira hodi minimiza risku no prevene korrupsaun.”
Orador prinsipal iha semináriu loron tomak ne’e mak Komisáriu Komisaun Anti-Korrupsaun (CAC), Adérito de Jesus Soares, Komisáriu Adjuntu José António de Jesus das Neves no Komisáriu Adjuntu Manuel Cotinho Bucar Corte-Real.
Iha sira nia aprezentasaun, Dirijentes Altu CAC na’in tolu ne’e, koalia kona-ba CAC nia disponibilidade iha kualker tempu atu servisu hamutuk ho SES halo asaun prevensaun no hadia instituisaun Estadu hodi minimiza risku no deteta krími sosial ne’e liu husi kría mekanisnu kontrolu ida efíkaz iha servisus administrásaun no rekursus umanus, finansas, no aprovizionamentu nian. Risku korrupsaun ne’e mosu tamba iha motivasaun, oportunidade no kondisaun favorable. Atu deteta no prevene korrupsaun, persija hatene didiak abut no risku korrupsaun nian, nune mekanismu kontrolu ne’ebé efikaz bele deteta lalais.
Sekretáriu Estadu Seguransa Fransisco Guterres apresia tebes inisiativa instituisaun CAC hodi realiza semináriu ne’e hodi tulun loke no habelar funsionáriu SES sira nia hanoin no koñesimentu kona-ba polítika kombate korrupsaun iha Timor-Leste.
Partisipantes iha workshop ne’e hamutuk ema nain 100 resin husi diresaun Polisia Nasional Timor Leste (PNTL), Bombeirus, Imigrasaun no Seguransa Sivil neb’e hamahon aan iha SES nia okos.
