Dili 27/07/2012– “CAC la’os inimígu públiku nian…ami nakloke nafatin no sei servisu hamutuk ho governu no parlamentu nasional foun halo prevensaun no kombate korrupsaun iha Timor-Leste,” tenik Komisáriu Komisaun Anti-Korrupsaun Adérito de Jesus Soars iha televizaun nasional (TVTL) nia intrevista eskluzivu ohin dader.

Intrevista ekskluzivu oras ida ho TVTL ne’e  husu Komisáriu Adérito atu fahe informasaun ruma konaba progresu no dezafius nebe hasóru durante hala’o servisu no oinsa servisu ba futuru, no mos husu ba Komisáriu atu koalia konaba importansia atu iha mekanismu aproriadu ida konaba deklarasaun rikusoin husi ofisiais públiku sira nebe seidauk preve didiak iha Lei No. 7/2007 konaba Estatutu Titulares no Orgaun Soberanu.

Intrevista ekskluzivu ne’e tuir kalendáriu TVTL sei públika orsida kalan tuku 7:00PM liu husi Programa Ekskluzivu no sei repete iha Sigunda dader 30 Jullu 2012 tuku 7:00AM.

Intrevista oras ida nia laran ne’e lidera husi Prezidente TVTL Expedito Diaz Xiemenes.