Dili, 29/06/2012- Timor-Leste nia Sumáriu Ekzekutivu husi relatóriu konaba revizaun ba auto-avaliasaun (Self-Assessment Review) ba implementasaun Konvensaun ONU kontra Korrupsaun (UNCAC) nian adopta ona durante sorumutu iha Vienna entre grupu nebe halo revizaun ba implementasaun (Implementation Review Group). Timor-Leste nudar nasaun dahat entre Estadu Partes hamutuk 41 nebe halo sira nia auto-avaliasaun iha 2011 nebe konsege publika nia Sumáriu Ekzekutivu iha tinan ne’e. Nasaun tolu seluk maka Australia, Suisa no Georgia.
Komisaun Anti-Korrupsaun nudar instituisaun nebe hamrik iha oin hodi lidera ba prosesu halo revizaun ba implementasaun Konvensaun ONU ne’e iha Timor-Leste no hetan apoiu tekniku husi Misaun ONU nian iha Timor-Leste (UNMIT). Komisáriu Adéritu de Jesus komenta katak publikasaun Sumáriu Ekzekutivu ne’e hanesan suksesu bo’ot ida ba nasaun Timor-Leste nebe konsege kumpri nia obrigasaun hanesan estadu parte ba konvensaun ONU ne’e nomos atu refleta konaba nia esforsu hodi kombate korrupsaun iha Timor-Leste.
“Sumáriu Ekzekutivu ne’e serve nudar lalenok ida ba ita atu hare oras ne’e ita iha nebe ona en-termus-de esforsu kombate korrupsaun no buat ne’e mos tulun ita atu identifika dezafius no oportunidades nebe mak sei enfrenta iha tempu oin mai relasiona ho implementasaun Konvensaun ONU nian ne’e iha Timor-Leste,” teni Komisáriu.
Relátoriu final husi revizaun ba auto-avaliasaun nene’ sei iha espetativa sei halo ramata molok sorumutu entre grupu halo revizaun ba implementasaun Konvensaun ne’e iha fulan Novembru 2012. Timor-Leste sei servisu besik malu hamutuk ho nasaun sira nebe halo revizaun, Namibia no Fiji, nomos Sekretariadu Mekasnismu ba halo Revizaun nian (Secretariat Review Mechanism) hodi finaliza relatóriu final ne’e. Versaun iha lian Ingles husi Sumáriu Ekzekutivu ne’e bele hare iha aneksu. Versaun iha lian Tetum no Portugus mak sei tuir ikus.
