22/06/2012—Horiseik loromanas, hamutuk estudante post-graduadu no lisensiatura na’in 15 husi programa Estudu Dezenvolvimentu Komunitaria International ka International Community Development Study program husi Universidade Vitoria iha Melbourne, Australia vizita Komisarun Anti-Korrupsaun iha Faril, Dili. Vizita husi estudantes universitaria ne’e halo parte husi programa study-tour semana rua universidade nian kon-ba Timor-Leste nia istoria, kultura no polítika.
Durante oras ida ho balun, Komisáriu CAC Adéritu de Jesus Soares halo aprezentasaun kona-ba servisu CAC nian durante ne’e iha área prevensaun no kombate korrupsaun iha Timor-Leste. Komisáriu mos koalia konaba lisaun husi rai seluk iha rejiaun ne’e kona-ba sira nia servisu kombate korrupsaun no dezafiu sira nebe sira enfrenta. Estudante sira haksolok no iha entuziasmu ho informasaun nebe Komisáriu CAC hato’o. Estudante sira husi perguntas oi-oin, inklui pergunta konaba oinsa prosesu investigasaun kazu korrupsaun iha Timor-Leste, instrumentu legal hodi kombate korrupsaun no kooperasaun entre instituisaun relevante sira iha servisu kombate korrupsaun.
Delegasaun husi programa study-tour ne’e lidera husi Doutor Helen Hill. Doutor Hill nudar Senior lecturer iha School of Social Science and Psychology, Universidade Vitoria.
