Dili14/05/2012–Iha loron Kinta no Sexta semana liu ba, Komisáriu Adjuntu Komisaun Anti-Korrupsaun (CAC) ba asuntu Edukasaun, Kampanha no Peskiza, Jose Antonio de Jesus das Neves, lidera sorumutu hamutuk ho representante husi Estadu no Sosiedade sira kona ba preparasaun vizita peritus nebe atu mai halo review ba implementasaun Konvensaun Nasoens Unidas Kontra Korrupsaun (CNUCC) nian iha Timor-Leste semana oin.
Tuir Komisáriu Adjuntu, sorumutu ne’e nia objektivu mak atu informa ba entidade hirak ne’e kona ba vizita husi peritus CNUCC nian, nune’e mos prepara hela asuntus kona ba Auto-Avaliasaun implementasaun CNUCC nian iha Timor Leste. Timor-Leste hahu nia prosesu Auto-Avaliasaun ba Konvensaun CNUCC iha tinan 2011 hafoin Governu Timor-Leste hatudu CAC sai nudar pontu-fokal hodi reprezenta Timor-Leste no hodi lidera prosesu ba Auto-Avaliasaun ne’e. Mekanismu Auto-Avaliasaun hare ba Siklu Dahuluk iha Kapitulu III kona ba Penalizasaun no Implementasaun Lei no Kapitulu IV kona ba Kooperasaun Internasional. Prosesu avaliasaun ne’e hetan suporta husi Sekretariadu Mekanismu Revizaun CNUCC nian iha Viena no Misaun ONU iha Timor-Leste (UNMIT). Iha auto-avaliasaun ne’e Timor-Leste presiza hatan perguntas 300 ho resin tuir formatu nebe Konferensia Estadu Parte sira aprova.
