Komisariu CAC Dr Sergio Lidera EAK ba Disemina Lei MPCC iha Munisipiu Ermera

Dili – Komisariu Comissão Anti-Corrupção (CAC) Dr. Sergio Hornai akompanha husi Diretor Geral Prevensaun no Sensibilizasaun Dr. Rosario Araujo, Diretora Promosaun Valores e Integridade Dra. Leonilda Lobato Segunda-feira (13/12) ne’e lidera ekipa Espesialista Anti-Korrupsaun (EAK) ida mai disemina Lei Nu. 7/2020 26 de Augosto – Medidas Prevensaun no Kombate Korrupsaun (MPCC) ba iha iha munisipiu Ermera.

Diseminasaun Lei MPCC durante loron tomak ne’e ofisialmente loke husi Prezidenti Autoridade Munisipiu Ermera Dr. José Martinho dos Santos Soares no partisipa husi kuaze Administrador Postu lima (5), Chefe Sukus, Diretor munisipiu linhas ministeriais destakadu iha Ermera, kargu chefeias, universitarius no emprezariu sira iha Munisipiu Ermera.

Aprezentador programa diseminasaun Lei Nu. 7/2020 MPCC ho Tema Sentral “HASAE KONESIMENTU AJENTE PUBLIKU KONABA LEI MEDIDAS REVENSAUN NO KOMBATE KORRUPSAUN” iha Ermera ne’e mak Komisariu CAC Sergio rasik no Diretora Promosaun Valores e Integridade Dra. Leonilda Lobato.

Komisariu Sergio iha ninian intervensaun hateten importansia principal CAC nian prezensa iha Ermera atu bele halekar informasaun bak ajente publiku kargu chefia sira iha funsionalismu publiku sira ne’ebé haknar an nudar servidor povu iha Munisipiu riku Café Ermera.

“Estadu hamosu lei (MPCC) ida ne’e atu husu fali responsabilidade ba ita boot sira husi Prezidenti Autoridade Munisipiu, Administradir Postu nain lima (5), director, chefe departamentu too ba iha chefe seksoens… Estadu fo (kargu) ba ita boot sira kolabora atu deklara ita boot sira ninian rikusoi,” Katak Komisariu Sergio Hornai iha ninian intervensaun.

Komisariu Sergio esklarese ba partisipante sira focus ba iha Kapitulu II Regime de Declaracao de Rendimentos, Bens e Intereses lei MPCC husi artigu 27 too artigu 58 Lei MPCC nian kona-ba oinsa hatoo deklarasaun rikusoi.

Iha momentu hanesan Diretora Promosaun Valores e Integridade Dra. Leonilda Lobato esplika kona-ba oinsa funsionariu publiku sira sei prense formulariu deklarasaun ninian wainhira lei ne’e entraga em vigor iha fulan Fevereiru tinan 2021.

“Tamba pozisaun ne’ebé ita boot sira kaer kargu ne’e Estadu ninian hakarak ou lakohi tenki responsabiliza fali ba iha Estadu ka governu. Estadu hakarak ita boot sira ninian responsabilidade, honestidade iha ne’ebé? Atu nune’e, fo hatene ba iha Estadu atu nune’e Estadu bele halo kontrolu ba iha ita boot sira ninian rikusoi,” Komisariu Sergio sublinha ba iha partisipante sira.

Komisariu CAC Dr. Sergio Hornai lori Komisaun nian naran hatoo apresiasaun aas no agradese ba Prezidenti Autoridade Munisipiu Ermera Dr. José dos Santos hamutuk ho ninian administrador postu administrativu sira, director no kargu cjefia sira hodi bele habiban an mai hamutuk ho KOmisaun fahe ba malu lei MPCC.

“Espera ita ninian Nai Postu Administrativu nain lima (5) iha Munisipiu Ermera, Nai 52 sukus, 277 aldeias bele transmit inormasaun sira ne’e ba iha ita nian komunidade sira. Ho ida ne’e espera Estadu bele hasae boa-governasaun ida transparenti, akuntabilidade, governasaun ida ho integridade atu nune’e buat hotu-hotu ne’ebé ita halo bele iha ninian folin, ninian benefisiu ba iha ita ninian komunidade,” Komisariu Sergio afirma.

Administrador Postu nain 5, funsionariu publiku assume kargu chefia sira no emprezarius iha munisipiu Ermera ho antusiasmu boot rona no akompanha esplikasaun Komisariu Sergio nian kona-ba lei MPCC nian aktivamente durante seminariu. Antusiasmu boot servidor povu no emprezarius sira iha Munisipiu Ermera ne’e espresa durante sesaun husu no hatan too seminariu remata. (*)

Permanent link to this article: http://cac.tl/2020/12/komisariu-cac-dr-sergio-lidera-eak-ba-disemina-lei-mpcc-iha-munisipiu-ermera/

CAC Hahu Disemina Lei MPCC iha Munisipiu Manatuto

Manatuto – Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun Dr. Luis de Oliverira Sampaio Sesta-feira (10/12) ne’e lidera ekipa Espesialista Anti-Korrupsaun (EAK) ida hahu disemina Lei Nu. 7/2020 26 de Augosto – Medidas Prevensaun no Kombate Korrupsaun (MPCC) ba iha iha munisipius.

Munisipiu Manatuto sai fatin dahuluk ba iha primeira faze Komisaun nian hodi ba disemina lei ne’e ba kargu chefias no administrador postu sira. Divulgasaun informasaun kona-ba Lei MPCC ne’e realiza iha Salaun Parokial Santo Antonio Mantuto.

Diseminasaun Lei MPCC durante loron tomak ne’e ofisialmente loke husi Sekretariu Munisipiu Manatuto Agripino da Silva Costa no partisipa husi kuaze Administrador Podtu, kargu chefeia no emprezariu sira iha Munisipiu Manatuto.

Aprezentador programa diseminasaun Lei Nu. 7/2020 MPCC ho Tema Sentral “HASAE KONESIMENTU AJENTE PUBLIKU KONABA LEI MEDIDAS REVENSAUN NO KOMBATE KORRUPSAUN” iha Mantuto ne’e mak Komisariu Adjunto Luis Sampaio no Chefe Unidade Estudu no Avaliasaun Riskus Dr. Cirilio Abi.

Komisariu Adjunto Luis Sampaio focus eslarese ba partisipantes sira iha Kapitulu II Regime de Declaracao de Rendimentos, Bens e Intereses lei MPCC husi artigu 27 too artigu 58 kona-ba oinsa hatoo deklarasaun rikusoi. Chefe Unidade Estudu no Avaliasaun Riskus esplika kona-ba formulariu deklarasaun ninian.

Administrador Postu, funsionariu publiku assume kargu chefia sira no emprezarius iha munisipiu Manatuto ho antusiasmu boot partisipa aktivamente seminariu durante loron ida ne’e. Antusiasmu boot servidor povu no emprezarius sira iha Munisipiu Manatuto ne’e hatudu durante sesaun husu no hatan.

Komisariu Adjunto Luis Sampaio iha ninian intervensaun hateten iha lei MPCC la obriga Komisaun ho EAK sira atu ba too iha munisipius no linhas ministerias sira hotu iha teritoriu Timor-Leste laran tomak hodi divulga lei ne’e.

“Maibe, lei ida ne’e iha ninian kompleksidade ho ninian konselkuensia seriu, tamba ne’e hanesan autoridade kompetente ai iha obrigasaun atu informa no sosializa ba ita boot (servidor publiku) sira atu ita la hakfodak,” Katak Komisariu Adjunto Sampaio.

Komisaun katak Komisariu Adjunto Sampaio sei halo esforsu hotu atu servidor povu iha teritoriu Timor-Leste laran tomak bele aksesu ba lei foun ida ne’e molok tama ba iha implementa ofisial iha loron 26 fulan Fevereiru 2021.

Sekretariu Munisipiu Manatuto Agripino da Silva Costa iha ninian palavras bemvidu ba Komisaun ne’ebé halao divulgasaun informasaun kona-ba lei MPCC hateten funsionariu publiku assume kargu chefias no administrador postu sira iha Munisipiu Balisan ne’e kuaze presente.

“Bemvidu e agradese ba Senhor Komisariu Adjunto ho nian ekipa tekniku CAC mai sosializa lei anti-korrupsaun. Ita sira presente ohin iha fatin ne’e reprezenta ona funsionariu publiku hamutuk 1.166 nudar ezekutor programa governu nian iha Munisipiu Manatuto,” Katak Sekretariu Munisipiu Manatuto Agripino da Silva.

“Ita sira ohin marka prezensa iha ne’e tenki hatoo ba (maluk FP) sira ne’ebé la hetan oportunidade mai tuir diseminasaun lei ida ne’e. Tamba- kargu ne’ebé ohin tula iha ita ninian kabas leten durante mandate. Loron ida mandate tula fali ba iha sira nian kabas leten karik pelu menus sira hatene ona,” Sekretariu Munisipiu Manatuto Agripino akresenta. (*)

Permanent link to this article: http://cac.tl/2020/12/cac-hahu-disemina-lei-mpcc-iha-munisipiu-manatuto/

Luta TL Kontra Korrupsaun Sei Lao iha Dalan Klaran

Dili – Comissão Anti-Corrupção (CAC) lori Estadu Timor-Leste nian naran servisu hamutuk ho Comissão Nacional das Eliçoes (CNE) Kuarta-feira (9/12) ohin komemora Loron Mundial Kontra Korrupsaun ne’ebé realiza iha edifisiu CNE nian iha Salaun Lalini Lariguto Colmera Dili.

Komisariu CAC Dr. Sergio Hornai iha ninian intervensaun hateten Timoroan sira nian luta kontra korrupsaun sei iha dalan klaran no naruk tebes. Nune’e, Komisariu Sergio husu Timoroan sira hamrik iha fileira ida hodi tula kamada ba malu kontribui ba iha luta sagradu ida ne’e ba povu no nasaun nian integridade diak.

“Objetivu lolos ba iha integridade atu kombate kriminalidade korrupsaun iha TL sei lao hela iha dalan ida ke naruk! Tamba ida ne’e, iha biban ida ne’e iha loron mundial anti korrupsaun ninian CAC bolu ita hotu! Mai ita hametin ita ninian fileira hodi tulun instituisaun Estadu ninian. Mais, husu nafatin ba iha Estadu atu rigor, prudente mesmu ita iha situasaun ida defisil atu asegura prosedimentu sira hotu atu labele kauza ba iha integridade Estadu niian,” Katak Komisariu Sergio.

Komemorasaun loron mundial kontra korrupsaun tinan ne’e, Komisaun realiza seminariu ho tema sentral “HASAE KONESIMENTU AJENTE PUBLIKU KONABA LEI MEDIDAS REVENSAUN NO KOMBATE KORRUPSAUN” spesialmente ba funsionariu publiku sira ne’ebé haknar-an iha CNE.

CAC Ofisialmente Lansa PECAC 2021-2025

Iha serimonia ne’e, Komisaun ofisialmente lansa ninian Planu Estratejika Comissão Anti-Corrupção (PECAC) rasik ne’ebé formula husi matenek nain Timoroan Konsultor CAC DR. Augusto Lourdes da Silva no Komisariu Adjunto ba Asuntu Kooperasaun Dr. Alexandre Freitas.

Total pajinas PECAC 2021-2025 nian hamutuk 57 no sei gia Komisaun iha Terseira Mandatu Komisariu nian hodi halao misaun prevene no kombate korrupsaun iha Timor tinan lima (5) mai.         

Iha serimonia ne’e, Komisaun halo rekonhesimentu ba joven patriota no nasionalista lubuk ida ne’ebé halao servisu voluntariamente tulun Komisaun oinsa atu eradika krimi korrupsaun iha TL. Komisaun atribuisaun sertifikadu ba sira no mos ba iha organizasaun Non-Governamental sira

Marka prezensa iha serimonia komemorasaun ne’e mak Komisariu Comissão Anti-Corrupção (CAC) Dr. Sergio Hornai, Ministro Prezidensia Konselhu Ministro Dr. Fidelis Magalhaes, Prezidenti CNE Dr. Alcino Barris, Provedora Direitus Huanu no Justisa Dra. Jesuina Gomes, Reprezentante Ministeriu Publiku no eis Komisariu CAC Dr. Adérito Pinto Tilman no Komisariu Adjuntu Dr. Rui dos Santos, Resprezentante PCIC, Komisariu CFP, reprezentante UNDP, Defensora Adjunta Republica Dra. Olga Barreto, reprezentante FONGTIL no konvidadus hamutuk besik 200. (*)  

Permanent link to this article: http://cac.tl/2020/12/luta-tl-kontra-korrupsaun-sei-lao-iha-dalan-klaran/

CAC Prende Batar Fohuk, Modo Dodok no Hapara Fahe Ai-Han Sesta Bazika iha Suku Comoro

Dili – Komisariu Adjunto Comissão Anti-Corrupção (CAC) ba Asuntu Prevensaun no Sensibilizasaun Dr. Luis de Oliveira Sampaio lidera Ekipa Espesialista Anti-Korrupsaun (EAK) ba halao intervensaun immediate hodi hapara obrigatoriamente fahe ai-han iha programa Sesta Bazika iha Super Merkadu Dili Mart Raikotu Dili tamba Kompanha Dili Mart fahe batar musan ho koto fohuk inklui modo dodok.

Aksaun ne’e Komisaun foti hafoin Kuarta-feira (9/12) ohin, EAK sira halao hela knar iha terenu hodi monitoriza prosesu fahe aihan Sesta-Basika. Maibe, EAK sira detekta batar fohuk, koto no modo tahan dodok sira ne’e la merese ona atu fahe hodi populasaun konsumu.

Komisaun laos hapara deit prosesu fahe ai-han bazika obrigatoriamente ba povu iha Suku Comoro, maibe prende mos ai-han sira ne’ebé fohuk ona hanesan batar, koto no modo tahan dodok sira.

Komisariu Adjunto CAC ba Asuntu Prevensaun no Sensibilizasaun Dr. Luis de Oliveira Sampaio hateten EAK no Komisaun la soi atu kompanha Dili Mart kontinua fahe aihan bazika sira tamba ai-han bazika fohuk sirak ne’e merese atu ba fo han fahi no laos povu kbit laek sira.

“Ami koalia tiha ona ho manager kompanha atu hapara distribuisaun ai-han bazika hanesan batar fohuk, koto no modo tahan dodok ba populasaun. Ai-han fohuk sira ne’e merese fo han ba animal ou fahi no laos ba ita ninian povu,” Katak Komisariu Adjunto CAC Dr. Luis Sampaio

Ekipa EAK mos prende café falun balun tamba la tuir lista gramas no folin ne’ebé Ministeriu Komersiu no Industria (MCI) determina. Maibe, iha terenu Kompanha Dili Mart fahe la tuir ninian kilogaramas determinadu.

Sei iha konsekuensia seriu ba irregularidade ida ne’e no Komisaun sei bolu manager kompanha no responsabel programa Sesta Bazika nian iha MCI.

“Batar ne’ebé fohuk ho modo ne’ebé dodo kami (prende) no sei halo prosesu. Depois ami sei notifika Nain ba Loja (Dili Mart) ne’e ho ninian responsavel sira. Autoridade kompetente (iha MCI) ne’ebé mak durante ne’e akompanha. sira ninian responsabilidade atu halo supervizaun. Sira mai e sira haree hela mais husik hela deit. (Pesoal MCI) sira ohin iha ne’e hela mais sira haree deit no la intervein. Sasan sira ne’e la refleta kualidade ne’ebé mak ita nian povu merese hetan ho valor ($50) ne’ebé mak iha,” Katak Komisariu Adjunto Luis Sampaio.

Komisariu mos hatutan teni Komisaun antes ne’e deskobre sirkumstansia hanesan iha fatin seluk’ Hera, Metinaro no Liquica maibe kompanha no autoridade kompetente la hadia.

“Entaun ohin ami halo intervensaun hodi hapara distribuisaun Sesta Bazika ne’e. Ami aviza tiha ona mais sira lakohi hadia. Entaun ami hapara  no lori sasan sira ne’e ba no halo prosesu investigasaun tuir mai,” Komisariu Adjunto Luis Sampaio afirma. (*)

Permanent link to this article: http://cac.tl/2020/12/cac-prende-batar-fohuk-modo-dodok-no-hapara-fahe-ai-han-sesta-bazika-fohuk-iha-suku-comoro/

Home
Account
Cart
Search