Komisariu CAC Sergio Hornai Sai Orador Prinsipal iha Workshop ba FP iha Munisipiu Manufahi

Komisariu Comissão Anti-Corrupção (CAC) Dr Sergio Hornai Tersa-feira (22/11) sai orador pronsipal iha workshop ba Funsionariu Publiku (FP) iha Munisipiu Manufahi ne’ebé organiza husi Provedoria Direitus Humanus no Justisa (PDHJ) bazeia ba Kooperasaun Institusional Quadrilateral entre instituisaun Estadu hat (4) CAC, PDHJ, CFP no IGE.

Aktividade Workshop via Kooperasaun Quadrilateral instituisaun xave hat ne’e ho tema “Prevene no Kombate Korrupsaun hodi Promove Governasaun Diak no Proteje Direitus Humanus iha Servisu Administrasaun Publiku” ne’e ho objetivu atu hasa’e prestasaun servisu, responsabilidade, disiplina, intergidade no dezempenha sira nia funsaun ho loloos no mos kontrolu ho efikas no efisiente husi FP linas ministeriais sira iha Salaun Administrasaun Munisipiu Manufahi.

Komisariu Sergio Hornai lori paper ida ho tema “Tipu no Forma Korrupsaun sira iha Seitor Publiku” koalia ba partisipante sira ne’ebé maioria assume kargu chefias iha linas ministeriais iha Munisipiu Manufahi katak direitu no dever tenki iha balansu.

Komisariu Sergio foti izemplu rua ne’ebé sai topiku sentral no viral oras ne’e iha media konvensional no media social nasional; Programa Cesta Basica no atribuisaun Fim do Ano $200 ba benefisiariu sira iha nebe dekretu lei hateten momoos FP sira ne’ebé ninian salariu mensal liu $501 la iha direitu atu simu programa governu rua ne’e.

“Nai Prezidenti Munisipiu, Administrador Posto, Chefe Suku no Chefe Aldeias sira iha responsabilidade boot hodi verifika sertamente lista uma kain sira hodi evita funsionariu publiku no funsionariu seitor privadu ho salariu tuir dekretu lei la permiti asesu programa Sexta Basica no atribuisaun fim do Ano $200,” Katak Komisariu Sergio iha ninian intervensaun.

Komisariu Sergio afirma funsionariu seitor privadu no funsionariu publiku ne’ebé ho salariu liu $501 mak simu CB no subsidiu fim do ano nian sei simu konsekuensia todan iha lei nian oin. “La iha direitu tamba funsionariu seitor publiku no seitor privadu ninian salariu liu $500,” Komisariu Sergio sublinha.

Parisipantes iha workshop loron sorin ne’e mak funionariu linas ministeriais assume kargu chefia sira ne’ebé haknar an iha Munisipiu Manufahi hanesan; Administrador Munisipiu, Diretor Edukasaun, Diretor Servisu Linas Sektorais, Diretor Rejionais, Diretores no Chefe Departamentu Saude sira iha Munisipiu Manufahi. (*)

Permanent link to this article: http://cac.tl/2022/11/komisariu-cac-sergio-hornai-sai-orador-prinsipal-iha-workshop-ba-fp-iha-munisipiu-manufahi-2/

Leave a Reply

Your email address will not be published.