Komisariu CAC Sergio Hornai Halao Sorumutu Kortezia ho Ambassador no Jaksa Senior KPK Indonesia

Komisariu Comissão Anti-Corrupção (CAC) Dr Sergio Hornai halao sorumutu kortezia ida ho Ambassador Republika Indonesia nian mai Timor-Leste Okto Dorinus Manik akompanha hosi Jaksa Senior Indonesia destaka iha Komisi Pemberantasan Korupsi (KPK) Ariawan Agustiantono Domingo (20/11) ne’e iha Embaxada Indonesia Palapaso Dili.

Obetivu principal husi sorumutu kortezia ida ne’e atu hametin lasu amizade entre Ambassador Republika Indonesia nian mai TL ho CAC no uza oportunidade ne’e ambassador introdus Jaksa Penuntut Senior iha KPK Indonesia ne’ebé oras ne’e halao hela vizita ofisial mai Dili.

Iha sorumutu kortezia ida ne’e, Komisariu Sergio troka ideas no impresoens ba malu ho Jaksa Penuntut Senior KPK Indonesia nian Ariawan Agustiatono kona-ba kooperasaun CAC TL no KPK Indonesia nian iha luta hamutuk kontra korrupsaun, maske memorandum of Understanding (MoU) entre ajensia anti korrupsaun rai rua CAC TL no KPK Indonesia ne’ebé asina iha tinan 2014 liu ba iha Jakarta kaduka tiha ona.

Parte rua koalia mos kona-ba haforsa politika prevensaun korrupsaun liu-liu esperiensia Jaksa Penuntut Senior KPK Indonesia nian ne’ebé tinan barak familiar ho asuntu deklarasaun rikusoi servidor Estado Indonesia nian no assets recovery.

“(Sorumutu kortezia) ida ne’e importante mai ita (CAC TL) atu manan espasu hodi ganha matenek no esperiensia Jaksa Penuntut Senior KPK Ariawan Agustiatono nian atu aplika iha TL. Tamba, senhor ne’e ema ida esperiensia servisu ho KPK Indonesia tinan barak no expert iha asuntu deklarasaun rikusoi servidor Estado Indonesia nian no rekoperasaun assets,” Katak Komisariu Sergio Hornai. (*)

Permanent link to this article: http://cac.tl/2022/11/komisariu-cac-sergio-hornai-halao-sorumutu-kortezia-ho-ambassador-no-jaksa-senior-kpk-indonesia/

Leave a Reply

Your email address will not be published.