CAC Realiza Serimonia Termu Aseitasaun ba EAC Foun Na’in 24

Comissão Anti-Corrupção (CAC) Segunda-feira (7/11) loraik ne’e ofisialmente realiza serimonia termu aseitasaun ba Especialista Anti-Corrupçao (EAC) foun na’in 24 nudar Estajiariu durante tinan ida iha edifisiu Sentral CAC Farol Dili.

Iha Prezidente juri Luis Ersio ninian relatóriu revela katak, molok CAC rekruta EAC foun na’in 24 ne’e hodi simu termu aseitasaun ohin liu prosesu naruk husi tinan 2021 iha etapa inskrisaun to’o etapa ikus teste fiziku iha Akademia Polisia Nasional Timor-Leste (PNTL) Comoro iha fulan Outobro 2022.

Planu rekursu humanu CAC nian, rekrutamentu EAC foun hamutuk nain 25 ba vagas 10. Maibe too iha faze ikus teste fiziku no CFP anunsia kandidatus aprovadu! Kandidatus ida resigna-an.

EAC Estajiariu hirak ne’e prense vagas 10; Saude, Direitu, Media no Komunikasaun, Konstrusaun Civil, Elektrisidade, Informasaun no Teknolojia, Ekononomia Jestaun Finanseira no Kontabilidade, Planeamentu Jestaun Programas, Kooperasaun Institusional no Politika Publiku.

Totál aplikante ba vaga EAC 10 iha tinan 2021 inisiu hamutuk 2.422 aplikantes iha ne’ebé mane hamutuk na’in 1.363 no feto 1.409 aplikantes.

Ekipa juri sira hala’o selesaun dokumentus ba aplikantes sira iha ne’ebé aplikantes hamutuk na’in 654 mak liu selesaun dokumentus hodi tuir ezame eskrita.

Ekipa juri sira kompostu husi internál CAC nian no eksternal mai husi Ministeriu Saude, PCIC, Ministeriu Finansan, Ministeriu Transporte no Komunikasaun, EDTL, Ministeriu Obras Publikas no hetan monitorizasaun husi CFP kandidatu na’in 95 liu iha teste eskrita.

Kandidatus 95 ne’e, na’in 71 mane no feto na’in 24 iha ne’ebé hakaat ba iha teste entervista professionál ekipa juri konsege ta’is kandidatu na’in 25 ne’ebé loron ohin simu termu aseitasaun solenemente. Entre sira na’in 25 ne’ebé liu iha vaga EAC foun ne’e na’in ida (1) rezigna-an.

Komisariu CAC Sergio Hornai akompaña husi Prezidente Interinu CFP Liurai Taci no Komisariu Adjuntu CAC na’in tolu (3) lidera serimonia solene loraik ida ne’e. EAC foun na’in 24 sei tuir formasaun durante fulan sia (9) molok sai EAC permanente koloka iha Diresaun Investigasaun Kriminal (DI), Diresaun Prevensaun no Sensibilizasaun (DPS) no Diresaun Servisu Apóiu no Kooperasaun (DSAK).

Komisariu Sergio Hornai iha eventu ne’e ko’alia ba EAC estagiariu sira bainhira hala’o knaar nu’udar estagiariu iha CAC atu buka forma hotu-hotu hodi garante instituisaun ida ne’ebé ho nia baze dezenvolvimentu ida justu, korektu, dedika ba servisu ho responsabilidade boot hodi kontribui ba estadu iha luta prevene no kombate krime korrupsaun.

“Buka hasa’e ita boot sira nia abilidade, koñesimentu, no sai espellu ba sosiedade perante iha luta kontra korrupsaun”, Katak Komisariu Sergio.

EAC foun hirak ne’e liu iha inskrisaun, selesaun dokumentus, izame eskrita, intervista professional, teste bom komportamentu, teste saude no ikus liu teste fiziku.

Permanent link to this article: http://cac.tl/2022/11/cac-realiza-serimonia-termu-aseitasaun-ba-eac-foun-nain-24/