CAC Ofisialmente Husik Ekipa Peskizadór Na’in 32 Ba Terenu Hala’o Peskiza Persepsaun Públiku Korrupsaun

Komisariu Comissão Anti-Corrupção (CAC) Sergio Hornai no Komisariu Adjuntu Prevensaun no Sensibilizasaun Luis Sampaio hamutuk ho Estrutura Espesialista Anti-Corrupção (EAK) iha Segunda-Feira (03/10) ohin ofisialmente husik ekipa peskizadór na’in 32 ba terenu hodi hahú realiza peskiza persepsaun públika korrupsaun tinan 2022 iha munisipiu 12 inklui RAEOA.

Ekipa peskizadór na’in 32 ne’e kompostu husi Espesialista Anti-Korrupsaun (EAK) na’in 15 no hetan apóiu husi estudante universitariu na’in 17 husi UNTL, UNPAZ no IOB.

Antes ekipa tun hala’o peskiza ida ne’e iha terenu, iha oportunidade ohin no aban hetan mós formasaun introdusaun báziku iha asuntu korrupsaun nian no formasaun siéntifiku no tékniku iha metodolojia peskiza nian husi péritu sira rai laran.

Programa peskiza persepsaun públika ba asuntu korrupsaun ne’e ho objetivu prinsipál atu buka no deskobre loloos públiku en jerál nia koñesimentu kona-ba hahalok korrupsaun ho nia kauza no efeitu sira ba Estadu no Povu nia destinu moris, no oinsá sukat públiku ninia koñesimentu ba prevene no kombate hahalok korrupsaun iha TL.

Importánsia husi peskiza ida ne’e mós atu buka, deskobre no rekolla informasaun no dadús sira hodi tulun liu-tan Estadu hatuur no projeta nia planu no politika ba prevensaun no eradikasaun krime korrupsaun ba interese no prosperiedade povu nian.

Komisariu Sergio Hornai iha oportunidade ne’e ko’alia ba ekipa peskizadór sira ne’ebé simu responsabilidade perante peskiza ida ne’e, partikularmente ba Universitáriu sira atu hala’o peskiza ida ne’e ho responsavel, garante peskiza ida siéntifiku hodi tulun Komisaun iha misaun prevensaun kriminalidade korrupsaun.

Komisariu Sergio husu ekipa peskizadór sira atu rekolla informasaun no dadus sira objetivamente, bazeia ba faktus iha terenu. Nune’e mós rekolla dadus sira ho detallu no akurasia ba fontes informadór xave sira.

“husu ba kolega sira atu labele foti dadus ne’ebé fiktif, tenke foti dadus ho loloos”, Komisariu Sergio hatete.

Peskiza persepsaun públika ba asuntu korrupsaun ida ne’e nu’udar programa Komisaun nian iha Unidade Estudu Avaliasaun Rísku (UEAR) iha Diresaun Prevensaun no Sensibilizasaun (DPS) nian ne’ebé realiza kada tinan 5 dala ida.

Programa peskiza ida ne’e realiza uluk ona iha tinan 2013 iha Komiariu CAC Aderito Soares nia mandatu, no tuir planu peskiza ida ne’e realiza fila fali iha tinan 2020, maibé ho situasaun kruél Covid-19 nian,  Komisaun adianta mai iha tinan 2022 ne’e.

Permanent link to this article: http://cac.tl/2022/10/cac-ofisialmente-husik-ekipa-peskizador-nain-32-ba-terenu-halao-peskiza-persepsaun-publiku-korrupsaun/