Komisariu Sergio Simu Vizita Kortezia Delegasaun USA Fausto Gusman

Komisariu Comissão Anti-Corrupção (CAC) Sergio Hornai akompaña husi Xefe Unidade Kooperasaun João Correia iha Kuarta-Feira (10/8) ohin simu vizita kortezia delegasaun Estadu Unidos America (USA) iha Timor-Leste Fausto Gusman no nia komitiva iha edifisiu CAC, Farol Dili.

Objetivu husi vizita ne’e hodi hato’o informasaun inisiál kompromisiu Estadu Unidus Amerika nian kona-ba konvida CAC sai orador iha eventu konferénsia internasionál hodi partilla esperiensia luta hasoru korrupsaun iha TL, iha ne’ebé sei hala’o iha sidade Washington America iha tinan 2023.

Sorumutu ida ne’e mós reprezentante USA Fausto Gusman ho kuriozu hakarak buka hatene liu-tan servisu ne’ebé Komisaun halo durante iha nia ezisténsia, liu-liu kona-ba planu prioridade Komisaun nian, progresu ne’ebé atinje ona no dezafiu sira ne’ebé Komisaun hasoru durante ne’e.

Komisariu Sergio Hornai esplika progresu lubuk ida ne’ebé CAC halo ona durante iha nia ezisténsia mak hametin integridade instituisaun Estadu sira, partikularmente konsensializa sosiedade organizmu públika no privada sira nia hanoin no konsiénsia no edukasaun ba foinsa’e sira kona-ba kuda kultura rejeisaun forte ba aktus korrupsaun.

Esforsu balun ne’ebé Komisaun halo, liu-liu iha dekada ida antes mak hamutuk ho poder politiku sira hodi hamosu lei Medida Prevensaun no Kombate Korrupsaun (MPCC) no dadaun ne’e hahú implementa ona, liu-liu iha rejime deklarasaun rikusoin nian.

Esforsu seluk ne’ebé Komisaun halo mak oinsá hamosu Estratéjia Nasionál Anti-Korrupsaun (ENAK) ne’ebé dadaun ne’e Komisaun prepara ona nia termu referénsia, timeline sira, no sei hamosu steering committee hodi involve entidade hotu-hotu tantu nasionál no internasionál, organizmu públiku no privada sira hodi fó opiniaun ba elaborasaun dokumentu ofisiál refere.

Komisariu Sergio Hornai esplika mós katak, dezafiu sira ne’ebé komisaun hasoru mak lei ba protesaun testemuña ba sidadaun sira ne’ebé seidauk iha, nune’e defikulta sidadaun sira ne’ebé hakarak hato’o keixa krime korrupsaun mai iha CAC, inklui mós ho lei ba rekuperasaun átivu ninian.

Gusman husu mós kona-ba vulnerabildade ne’ebé Komisaun enfrenta durante iha nia ezisténsia no karik hetan influensia ruma husi poder politiku sira.

Komisariu Sergio hatete katak TL nu’udar Estadu direitu demokrátiku, no Komisaun iha ninia lejitimidade ne’ebé forte la iha vulnerabilidade boot liu. Komisaun nem hakruuk ba pesoál sé de’it ne’ebé iha poder polítiku no sempre firme hodi hatuur nafatin prinsipiu sira separasaun poder.

“Ita iha legitimidade, ne’ebé la ta’uk atu servisu ba defende justisa. Mate ohin, mate aban, ita la ta’uk atu defende justisa”, katak komisariu.

Alende ne’e, Komisariu Sergio esplika mós katak Komisaun servisu di’ak hodi koopera ho instituisaun Estadu hotu, maibé ba pesoál sira ne’ebé la kumpre ba lei, Komisaun nafatin hala’o nia knaar tuir legalidade no objetividade.

Permanent link to this article: http://cac.tl/2022/08/komisariu-sergio-simu-vizita-kortezia-delegasaun-usa-fausto-gusman/