CAC Hetan Konvite Sosializa Lei MPCC Iha MAPCOMS

Komisariu Comissão Anti-Corrupção (CAC) Sergio Hornai hamutuk ho Komisariu Adjuntu Prevensaun no Sensibilizasaun Luis Sampaio akompaña husi Xefe Unidade Inspeksaun no Monitorizasaun Antonino Alves iha Kinta-feira (11/8) ohin realiza sensibilizasaun lei Nú. 7/2020-MPCC ba servidór públiku kargu xefia no funsionáriu MAPCOMS nian iha Salaun Museum Rezizténsia Colmera Dili.

Atividade sensibilizasaun ida ne’e realiza hafoin Komisaun simu karta konvite husi Ministru MAPCOMS Fransisco Jeronimo ne’ebé husu sensibiliza lei MPCC ba nia dirijente no funsionáriu sira.

Objetivu prinsipál husi konvite ida ne’e, MAPCOMS hakarak buka entende detallu no di’ak liu-tan provizaun sira espesifiku ba lei MPCC, liu-liu iha konteudu sira ne’ebé ko’alia kona-ba medida sira prevensaun korrupsaun ninian no iha rejime Deklarasaun Rendimentu, Bens no Interese (DRBI).

Servidór Públiku, liu-liu kargu xefia sira iha Ministériu ne’e kuaze hotu-hotu deklara ona sira nia rikusoin mai iha CAC hafoin Komisaun hala’o lansamentu ba Sistema rejistu online iha fulan fevereiru liu-ba, tanba ho menus koñesimentu ba konteudu lei refere ohin MAPKOMS hakarak konvida fila-fali Komisaun sensibiliza lei refere hodi hakle’an no aperfeisoa sira nia koñesimentu no sensivel ho Sistema foun refere.

Iha programa sensibilizasaun ohin hato’o breve palavra husi Komisariu Sergio Hornai no Ministru Fransisco Geronimo, no aprezenta matéria lei MPCC husi Komisariu Adjuntu Sampaio.

Hafoin termina aprezentasaun lei MPCC ba kargu xefia no funsionáriu sira iha MPAKOMS, Komisariu Adjuntu Sampaio prezume katak, lei medida prevensaun no kombate korrupsaun fó enfaze liu ba asaun prevensaun.

Adjuntu Sampaio afirma katak, asaun prevensaun ba servidór públiku sira atu la monu ba tipu krime korrupsaun sira mak obrigadu deklara sira nia rikusoin.

“Atu ita hotu labele tama ba asume responsabilidade kriminál, ita kumpre de’it deklara ita nia rikusoin, no ne’e ita sei la to’o ba tipu sira krime korrupsaun nian”, katak Adjuntu Sampaio.

Partisipa iha eventu sensibilizasaun ne’e ho totál dirijente no funsionáriu públiku sira hamutuk na’in 69, kompostu husi funsionáriu MAPKOMS, Tatoli,IP no RTTL, EP.

Permanent link to this article: http://cac.tl/2022/08/cac-hetan-konvite-sosializa-lei-mpcc-iha-mapcoms/