Komisariu CAC Sergio no Estrutura Investigasaun Kriminál Hala’o Sorumutu Kortezia ho Delegasaun Komite 12 Novembro 91

Komisariu Comissão Anti-Corrupção (CAC) Sergio Hornai akompaña husi Komisariu Adjuntu ba Asuntu Investigasaun Kriminál Augusto Castro, Director Investigasaun José Verdial no Chefe Unidade Informasaun no Seguransa Euclides Madeira Kuarta-feira (8/6) dader ne’e simu visita kortezia ida husi autór prinsipál ba Asaun Dame Massakre Santa Cruz 12 Novembru 1991 nian ne’ebé oras ne’e hamahon-an iha Komite 12 Novembru iha Salaun Sorumutu CAC nian Farol Dili.

Xefe Delegasaun Komite 12 Novembru 91 Señor Jacinto Alves mai halo audiénsia dadersan ne’e ho objetivu atu fornese informasaun inisiál kona-ba projeitu konstrusaun “Monumentu Massakre 12 Novembru 1991” nian ne’ebé responsabiliza husi Ministeriu Asuntu Veteranus no Kombatentes Libertasaun Nasionál.

Delegasaun Komite 12 Novembru 91 esplika ba Komisariu Sergio ho estrutura Investigasaun Kriminál CAC nian ho objetivu atu loke horizonte servisu na’in CAC nian ho informasaun ne’ebé fornese hodi bele utíl iha CAC nian melhoramentu servisu investigasaun kriminál.

Iha sorumutu ne’e, Señor Jacinto Alves ho ninian membru delegasaun sira mai halo audiénsia la’os atu mai hato’o keixa ba Komisariu ho estrutura Investigasaun Kriminál nian, maibé halo audiénsia ho intensaun atu CAC halo totál maneira oinsá bele akompaña prosesu konstrusaun “Monumentu Massakre 12 Novembro 1991” nian iha rate Santa Cruz nu’udar memoria istóriku hodi rai hela ba jerasaun Timorense tuir mai ho kualidade di’ak.

Iha oportunidade audiensia kortezia ida ne’e, Komisariu Sergio esplika ba former freedom fighters urbana no eis prisoneiru sira kona-ba misaun no vizaun Komisaun nian iha ne’ebé hala’o knaar tuir lei númeru 8/2009 15 Jullu fó mandatu rua; Investigasaun Kriminál no Prevensaun Kriminál.

Komisariu Hornai esplika mós ba Mate Restu Massakre 12 Novembro 91 nian kona-ba lejislasaun foun Nú. 7/2020 Medidas Prevensaun no Kombate Korrupsaun (MPCC) ne’ebé fó poder boot liu tan mai CAC iha implementasaun luta prevene no kombate korrupsaun iha rai doben Timor-Leste.

Alende, esplika lala’ok servisu Investigasaun Kriminál no Prevensaun Kriminál korrupsaun, esplika mós ba lideransa mate restu masakre 12 Novermbru 1991 lidera husi Señor Jacinto Alves kona-ba Diresaun seluk ne’ebé sai “dapur” ba Komisaun nian iha área administrasaun no finansas; Diresaun Servisu Apóiu no Kooperasaun (DSAK).

Komisariu Sergio mós esplika ba membrus delegasaun Komite 12 Novembru sira katak, esforsu prevene no kombate korrupsaun halo makaas iha Terseira Mandatu Komisariu nian maske sei iha frakezas servisu sira iha ne’ebé presiza kamada sosiedade Timorense tomak nian kontribuisaun hodi konkretiza mehi boot Timoroan sira nian iha luta sagradu ida ne’e iha tempu Ukun-Rasik-An.

Komisariun Sergio hamutuk ho Komisariu Adjunto Augusto Castro husu ba Komite 12 Novembru ho ninian iistoria heróiku iha pasadu nu’udar freedom fighter Urbana nian bele tulun CAC hodi konsiensializa Timoroan tomak atu Timor-Leste bele livre husi kriminalidade korrupsaun ba moris di’ak Asswai’n sira ne’ebé mate ba kauza Ukun Rasik-An nian.

Maske sorumutu ida ne’e nu’udar audiensia kortezia, maibeé Komisariu Sergio Hornai ho estrutura investigasaun kriminál agradese ba informasaun sira revela durante diskusaun no konsidera audiensia ida ne’e nu’udar informasaun preliminaria ida hanesan denúnsia no keixa iha ne’ebé Komisaun sei rejista no iha posibilidade sei foti medidas bainhira akontese indikasaun infrasaun no krime ruma.

Komisaun komprimitidu katak, ho informasaun inisiál sira ne’ebé delegasaun Komite 12 Novembru 91 fornese sei loke dalan ba CAC atu halo akonselamentu ba Ministeriu ba Asuntu Veteranus no Kombatentes Libertasaun Nasionál no hahú servisu rekolla informasaun kona-ba prosesu tomak bainhira presiza tuir lei. (*)

Permanent link to this article: http://cac.tl/2022/06/komisariu-cac-sergio-no-estrutura-investigasaun-kriminal-halao-sorumutu-kortezia-ho-delegasaun-komite-12-novembro-91/