CAC no PDHJ Identifika Lákuna no Defisiénsia Balun iha Preparasaun Implementasaun Programa SB

Ekipa Kontrolu Comissão Anti-Corrupção (CAC) no Provedoria dos Direitos Humanos e Justiçã (PDHJ) lidera husi Komisariu Adjuntu Prevensaun no Sensibilizasaun Luis de Oliveira Sampaio no Adjuntu Boa Governasaun-PDHJ José Cristovão Segunda-Feira (13/6) ohin hasoru malu ho Vice-Ministro Comercio e Industria ho nia ekipa hodi partilla infromasaun ba malu kona-ba prosesu preparasaun implementasaun programa sesta-bázika segundu faze iha edifisiu MTCI Bebora Dili.

Sorumutu ne’e, CAC no PDHJ hakbesik ho Vice-Ministru Turizmu Komersiu no Industria hodi rona no buka hatene informasaun profunda ba prosesu preparasaun programa sesta-bázika, liu-liu iha parte MTCI ninian. CAC no PDHJ hato’o mós kestaun balun kona-ba informasaun sira liga ho preparasaun tékniku husi orgaun implementadór ba implementasaun programa Sesta-Bázika ne’e.

Ekipa CAC no PDHJ ko’alia ba Vise Ministru MTCI katak, CAC no PDHJ nia akompañamentu no halo koordenasaun ho Sekretariadu Tékniku durante ne’e nota no identifika lákuna no defisiénsia balun iha preparasaun programa SB ne’e, tanba seidauk kompleta rekezitu balun relasiona ho provizaun sira dekretu lei nú 10/2022- kona-ba Medida Reforsu Implementasaun Programa Sesta-Bázika nian.

Identifikasaun hirak ne’e inklui ona ho defikuldade tékniku hodi reuni dadus konsolidadu benefisiáriu sira husi Sekretariadu Tékniku iha tempu badak, no la klareza kona-ba produtu lokál sira iha ‘stock’, tanba ekipa kontrolu sira seidauk hetan informasaun ka dadus ruma husi ST kona-ba prosesu mobilizasaun no koordenasaun ho kooperativa ka produtor lokál sira kona-ba disponibilidade produtu lokál ba objetivu implementasaun programa ne’e.

CAC no PDHJ mós aprezenta kestaun no dúvida balun ba Vise-Ministru MTCI hodi halo klarifikasaun kona-ba lista kompaña sira ne’ebé partisipa iha prosesu konkursu programa sesta-bázika nian, no husu atu fasilita dadus kompaña hirak ne’e mai orgaun kontrolu hodi halo akompañamentu ba prosesu sira ne’e.

Vise-Ministru MTCI nian mós preokupa ho kestaun lubuk ida ba implementasaun programa Sesta-Bázika faze daruak nian ne’e, no rekoñese iha defisiénsia balun iha aspetu politika no tékniku nian ba programa refere.

Vise-Minsitru MTCI mós husu tulun mós ba ekipa kontrolu CAC no PDHJ atu nafatin hala’o servisu tuir mandatu ne’ebé lei fó no kontinua fó hanoin juridikamente no téknikamente sira ba orgaun implementadór hodi hadi’a sistema judisiál no administrasaun públika ida moos no promove boa guvernasaun.

Enkuantu ba servisu interese Estadu no garante administrasaun públiku ida efisiensia no efetividade ba programa sesta-bázika nian, antes ne’e, ekipa konjunta CAC no PDHJ mós halo ona komunikasaun akonsellamentu no rekomendasaun beibeik ona ho parte Sekretariadu Tékniku nian hodi hato’o pontus krítikus sira kona-ba elementu legál ba programa Sesta-Bázika nian hodi hadi’a lákuna no defisiénte ne’ebé iha antes implementa programa refere.

CAC no PDHJ halo ona sorumutu akonsellamentu ho Sekretariadu Tékniku liu-husi enkontru prezensiál no mós haruka karta akonsellamentu beibeik ona ba Sekretariadu Tékniku hodi kumpre dekretu lei nú 10/2022-Medida Reforsu Implementasaun Program Sesta-Bázika nian no prevene poténsia rísku korrupsaun.

Sorumutu akonsellamentu ne’ebé realiza beibeik ne’e mós nu’udar responsabilidade juridika orgaun kontrolu CAC no PDHJ nian no nu’udar servisu integrante iha ámbitu prevensaun krime korrupsaun no promosaun boa guvernasaun nian ne’ebé estipula iha Artigu 5 (1) letra (c) Lei nú. 8/2009 kona-ba Kriasaun CAC, iha ámbitu prevensaun krime korrupsaun nian no tuir artigu 24 (a) no Artigo 35 husi Lei 7/2004, alterada husi Lei 8/2009, kona-ba Estatuto PDHJ; Nune’e mós Artigu 3 (3) husi Estatutu PDHJ, ne’ebé mak aprova husi Lei nu. 7/2004 ho nia alterasaun dahuluk husi Lei nú. 8/2009.

Permanent link to this article: http://cac.tl/2022/06/cac-no-pdhj-identifika-lakuna-no-defisiensia-balun-iha-preparasaun-implementasaun-programa-sb/