CAC Akonsella Responsavel Sekretariadu Tékniku: Asegura Programa SB Faze Daruak Implementa Tuir Lei

Comissão Anti-Corrupção (CAC) liu husi Diresaun Prevensaun no Sensibilizasaun (DPS) lideradu Komisariu Adjuntu Luis de Oliveira Sampaio hamutuk ho Xefe Unidade Avaliasaun, Estudu no Rísku (UAER) no Xefe Unidade Promosaun, Valór no Integridade (UPVI) Tersa-Feira (17/05) ohin hala’o sorumutu akonsellamentu ho responsavél Sekretariadu Tékniku Programa Sesta Bázika, MTCI Hernani Soares ho nia ekipa iha edifisiu CAC Vila-Verde, Dili.

Objetivu husi sorumutu ne’e, Ekipa Sekretariadu Tékniku MTCI ninian ho inisiativa koordena besik mai CAC hodi rona CAC nia pontus rekomendasaun sira, buka asertasaun no partilla informasaun hamutuk hodi asegura prosesu implementasaun programa SB faze daruak tuir lei no prevene krime korrupsaun iha faze implementasaun iha tereñu.

Diskusaun ohin, ekipa CAC partilla esperiénsia monitorizasaun programa sesta bázika faze primeiru nian ne’ebé identifika indikasaun forte ba irregularidade oioin ne’ebé potensia ba rísku korrupsaun.

CAC mós partilla no rekomenda pontus konsiderasaun sira ne’ebé hatuur iha dekretu lei nú. 10/2022 kona-ba Medida Reforsu Distribuisaun Sesta-Bázika iha artigu 18 aliñea 1 define katak kompeténsia Sekretariadu Tékniku sei dezenvolve prosedimentu administrativu no tékniku ba apóiu distribuisaun sesta-bázika no garante uniformizasaun ba prosedimentu no prepara lista finál benefisiariu sesta-bázika.

Ekipa CAC mós fó hanoin responsavel Sekretariadu Tékniku MTCI ho nia ekipa atu asegura kualidade produtu ne’ebé nutritivu, kompaña distributor sira tenke kualidade, garante produtu tuir presu merkadu, tékniku sira husi operador programa ne’e tenke komprende didi’ak lei no prosediemntu sira, inklui halo sosializasaun matadalan no direitu benefisiariu sira nian ba públiku antes implementa.

Alende diskusaun tékniku ohin, antes ne’e, Ekipa Tékniku CAC lideradu Komisariu Adjuntu Prevensaun no Sensibilizasaun, Luis de Oliveira Sampaio envia ona karta akonsellamentu ida ba Kordenadora Jerál Programa Sesta-Bázika nian no kopia ba Ministru MTCI ho nia Vice no kargu Diretór sira, inklui Ministru MKAE no SEKOOP hodi husu asegura funsionamentu Sekretariadu Tékniku (ST) ho nia kompeténsia no prosediemntu relevantes sira aplikavel antes implementa programa ne’e.

Liu husi karta akonsellamentu ne’ebé envia ba Kordenadór Jerál ST iha loron 3 Fulan Maiu tinan 2022 liu-ba, Komisariu Adjuntu Sampaio hatete, durasaun ba implementasaun programa ne’e (programa sesta-bázika) durante tinan 2022, tanba ne’e, CAC akonsella operadór implementasaun SB faze daruak nian hodi asegura prosesu ne’e la’o tuir rekezitu sira ne’ebé lei define, nune’e prevene rísku korrupsaun no prevene prezuizu ba Estadu.

Ba interese integradu servisu prevensaun nian, CAC interesadu atu hatene membru husi ekipa tékniku sira atu halo reuniaun no kordenasaun servisu, atu asegura katak, Sekretariadu Tékniku (ST) ho nia kompeténsia sira funsiona tuir lei haruka.

“Iha kazu kontrariu, bainhira Sekretariadu Tékniku (ST) ho prosedimentu obrigatóriu relevante sira mak seidauk estabelese no introduz, maibé programa ne’e hahú implementa, hafoin iha tereñu mak ekipa monitorizasaun sira deskobre irregularidade ne’ebé rezulta lori prezuizu ba Estadu, maka CAC sei ezerse ninia papel atu loke prosesu investigasaun ba responsavel sira ne’ebé involve iha programa ne’e”, katak Adjuntu Sampaio iha karta akonsellamentu ne’e.

Iha sorin seluk, diskusaun ba mekanizmu kontrolu programa Sest-Bázika faze daruak nian, CAC halo ona sorumutu kordenasaun besik no ativu ho PDHJ, AIFAESA, Tane Konsumidor, FONGTIL no mós ho JSMP. Ekipa konjunta ne’e hamutuk ona iha forsa koletiva ida ne’ebé bem preparadu ona atu halo monitorizasaun iha tereñu.

Permanent link to this article: http://cac.tl/2022/05/cac-akonsella-responsavel-sekretariadu-tekniku-asegura-programa-sb-faze-daruak-implementa-tuir-lei/