Universitarius IPB Futuru Nasaun TL Tenke Luta Kontra Korrupsaun

Betano– Komisariu Adjuntu Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio husu ba sivitas akadémika sira iha Institutu Politékniku Betano (IPB) nu’udar futuru nasaun Timor-Leste tenke hamrik metin, firme ho prinsipiu iha luta kontra korrupsaun.

Adjuntu Sampaio hato’o lia hirak ne’e bainhira sai oradór prinsipál ba sosializasaun Lei Nú. 7/2020 Medidas Prevensaun no Kombate Korrupsaun (MPCC) iha kampus IPB Betano Munisipiu Manufahi Same iha loron Kinta-feira (18/11).

Partisipantes iha programa Sensibilizasaun besik 100 ne’e ho tema “Harii, Kuda Mentalidade Juventude Kontra Korrupsaun, Onestidade mak Xave ba Prevene no Kombate Korrupsaun”.

Objetivu prinsipál husi atividade ne’e atu hakbiit universitarius no korpu dosente sira ninian koñesimentu kona-ba prevene no kombate korrupsaun iha edukasaun ensinu superior.

Sensibilizasaun ne’e mós oportunidade di’ak atu promove partisipasaun ativu universitarius no dosente sira ninian iha prosesu luta kontra korrupsaun nian iha rai doben Timor-Leste.

Adjuntu Sampaio dezafia konsiénsia koletiva universitarius nian nu’udar futuru nasaun joven TL ho ninian manorin dosente sira iha IPB Betano atu unifika forsa, matenek no kapasidade ho korajen iha asaun reál ba luta sagradu ida ne’e ba moris di’ak povu Timoroan sira nian.

“So ita tau forsa hamutuk ho esperansa iha determinasaun ida forte mak ita bele kombate korrupsaun. Ha’u fiar Timoroan sira bele”, Katak Luis Sampaio iha ninian intervensaun.

“Ita boot sira hanesan estudante na’in ba nasaun nia futuru, ita boot sira mak sai autór no promotor ba promove prospieridade povu no nasaun ida ne’e liu husi dalan mak asaun prevensaun no kombate korrupsaun”, Komisariu Luis Subliña.

Iha programa sensibilizasaun ne’e, Komisariu Adjuntu Luis afirma ba dosente no universitarius sira papel importante Comição Anti-Corrupção nian tuir baze legá lei nú 8/2009- Kriasaun Komisaun Anti Korrupsaun ne’ebé fó kompeténsia ba Komisaun atu halo servisu boot rua hodi kombate korrupsaun liu husi asaun prevensaun, edukasaun no asaun represivu ka investigasaun kriminál.

Komisariu Adjuntu Luis iha oportunidade ne’e mós fokus esplika mós tipu krime sira kona-ba pekulatu, pekulatu de uzu, abuzu poder, partisipasaun ekonomika, tráfiku influénsia, partisipasaun ekonomika, no mós esplika lei nú 7/2020- medida prevensaun no kombate korrupsaun – MPCC. (*)

Permanent link to this article: http://cac.tl/2022/04/universitarius-ipb-futuru-nasaun-tl-tenke-luta-kontra-korrupsaun/