“Universitariu FD UNTL Tenke sai Vinduras iha Aliserse ba Estadu Direitu no Jurista ho Sabedoria Di’ak” Komisario Sergio

Dili- Komisariu Comição Anti-Corrupção (CAC) Sergio Hornai Kuarta-feira (13/10) ne’e sai orador prinsipál iha eventu komemorasaun aniversariu tinan 16 ezisténsia Fakuldade Direitu (FD) Universidade Nasionál Timor Lorosae (UNTL) ho tema “Promove no Eleva Koñesimentu Jurídiku ba Estudante Fakuldade Direitu” iha Salaun Auditorium UNTL Dili. Paper ne’ebé Komisariu Hornai aprezenta iha okaziaun ne’e mak “Papél Jurista ba Konsolidasaun Estadu Direitu Demokratiku iha Sosiedade Timorense”.

Komisario Sergio Hornai ko’alia ba universitariu atu sai vinduras iha aliserse ba estadu direitu no buka hatene, koñese no fó resposta ba sosiedade Timorense nian problema direitu kriminál, direitu konstitusionál, direitu administrativu, direitu sivíl no direitu prosesuál.

Komisariu Sergio enkoraja universitarius Fakuldade Direitu UNTL nian atu estuda maka’as hodi sai jurista di’ak ho responsabilidade boot ba konsolidasaun Estadu Direitu Demokrátiku Timor-Leste ho konsiénsia no kompaisaun di’ak mós.

Tempu ona ba ita boot sira atu na’ok professor sira nia matenek, sabedoria, paisaun, dedikasaun hodi ita bot sira bele halo prozesaun ba oin”, Katak Komisariu Sergio iha ninian aprezentasaun ba universitariu sira.

Komisariu Sergio Hornai esplika ba universitariu sira katak papél jurista nian iha sosiedade mak atu halo servisu ba justisa iha ne’ebé área ne’e importante ba fortalesimentu Estadu Direitu Demokrátiku, boa governasaun no respeitu ba direitu umanu no liberdade fundamentál sira. Papél Juiz nian mak atu kontribui no pasifika desizaun hotu, iha ne’ebé problema sira levanta husi sidadaun ruma, revé nia mandatáriu, advogadu, hodi fó solusaun relativamente ho kauza sira justisa nian. (*)

Permanent link to this article: http://cac.tl/2022/04/universitariu-fd-untl-tenke-sai-vinduras-iha-aliserse-ba-estadu-direitu-no-jurista-ho-sabedoria-diak-komisario-sergio/