Setór Privadu Parseiru Di’ak Estadu nian Servisu Loloos hodi Lori Dezenvolvimentu Ekonomia Sustentavel ba Povu

Dili – Komisariu Comissão Anti-Corrupção (CAC) Sergio Hornai hatete atu Timoroan sira la lori Estadu Timor-Leste monu ba iha situasaun frazil no falla nune’e instituisaun CAC ne’ebé hetan mandate lejislasaun hala’o diseminasaun Lei Numeru 7/2020 – Medidas Prevensaun no Kombate Korrupsaun (MPCC) ba seitor publiku no privadu iha luta kolektiva prevene aktus korrupsaun nian atu asegura dezenvolvimentu ekonomia ida sustentavel ba nasaun joven Timor-Leste (TL).

Seitor privadu nu’udar parseiru importante Estadu nian iha prosesu konstrusaun Estadu no dezenvoolvimentu sustentavel ekonomia nasaun TL nian, manu-ain Komisaun  nian iha obriasaun atu sesnsibiliza  lei Lei Nu. 7/2020 MPCC ba seitor privadu ne’ebé haibur malu iha Camara Comersiu e Industria (CCI-TL) ne’ebé lidera husi Oscar Lima iha Salaun Delta Nova, Tersa-Feira (30/11) ne’e.

Komisariu CAC Sergio Hornai ba empresarius nasional iha CCI-TL katak CAC nudar meius importante no efektivu emprezariu Timoroan sira iha responsabilidade boot atu asegura boa governasaun, transparánsia, akuntabilidade no responsabilidade iha aktividades ekonomia.

Iha oportunidade sorumutu diseminasaun lei MPCC ne’e Komisariu Sergio dezafia emprezariu Timoroan sira membrus CCI-TL atu halao aktividades ekonomia ho vizaun, métodu no aksaun ho loloos hodi tane aas honestidade atu insenstiva dezenvolvimentu ekonomia rai laran ho politika diversifikasaun.

“Servisu hamutuk ho seitor publiku ho diak, transparante, honestidade no akuntabilidade hodi insentiva setór produtivu nune’e bele asegura ekonomia nasaun nian ida sustentabilidade. Ho ida ne’e de’it mak bele lori prosperiedade ba povu no Estadu,” Katak Komisariu Hornai.

Komisariu Hornai esplika ba partisipante sorumutu ho CAC konaba Lei Nú. 7/2020- MPCC iha  artigu 20 haktu’ur Medida Jerál ba prevene korrupsaun iha setór privadu ho espikasaun klaru 1) Bainhira halo formulasaun no dezenvolvimentu ba standards no prosedimentu sira, iha rejime autorregulasaun nia ka eterregulasaun, ho objetivu atu salvaguarda integridade hosi entidade sira setór privadu nian, tenke inklui liuliu, matéria importante sira maka kódigu konduta no kódigu governasaun emprezariál, atu dezempeña ho loos, ho dignidade no adekuadu atividade ekonomia no ezerse profisaun ne’e rasik, hodi prevene konflitu interese, no hodi promove prátika komérsiu di’ak entre empreza sira, nune’e mós relasaun sira kontratu nian entre empreza ho Estadu. 2) Violasaun ba konduta hirak-ne’ebé impoin ona tenke sai objetu ba sansaun ne’ebé prevee iha estatutu asosiasaun emprezariál nian.

Seitor privadu parseiru importante Estadu nian tenki iha sabedoria diak iha partisipasaun dezenvolvimentu ekonomia nasaun doben Timor-Leste ho aktividades ekonomia transparante no akuntabilidade ba moris diak povu nian,” Komisariu Hornai salienta. (*)

Permanent link to this article: http://cac.tl/2022/04/setor-privadu-parseiru-diak-estadu-nian-servisu-loloos-hodi-lori-dezenvolvimentu-ekonomia-sustentavel-ba-povu/