Programa Sensibilizasaun Lei MPCC atu Fo Hanoin FP La Monu Ba Krimi Korrupsaun

Liquiça – Komisariu Comissão Anti-Corrupção (CAC) ba Asuntu Prevensaun no Sensibilizasaun Luis de Oliveira Sampaio hamutuk ho ekipa Espesialista Anti-Korrupsaun (EAK) Tersa-feira (21/9) semana ne’e kontinua hala’o programa sensibilizasaun kona-ba Lei Nú 7/2020 Medidas Prevenção Combate Corrupcão (MPCC) iha Munisipiu Liquiça.

Sosializasaun Lei MPCC realiza iha Salaun Administrasaun Munisipál no partisipantes mai husi estrutura foun Autoridade Munisipál ne’ebé foin eleitu; diretóres, administradór, autoridade lokál, emprezarius no servidor públiku munisipal nian.

Iha programa sensibilizasaun ne’e, Komisariu Adjuntu Luis Sampaio ko’alia ba partisipantes husi fuan ba fuan katak Senior Management CAC ho Espesialista Anti-Korrupsaun (EAK) ne’ebé haknar iha instituisaun CAC hala’o teritoriu Timor laran tomak liu husi Programa Sensibilizasaun Lei MPCC atu fó hanoin ba ninian belun Timoroan sira atu serví povu ho di’ak no la monu ba iha tentasaun krime korrupsaun.

“Iha ámbitu (sorumutu) prevensaun (ida ne’e) mak ita aviza no akonsella malu katak amigu (CAC) di’ak mak avizu uluk antes (funsionariu públiku ida) monu ba rai ku’ak (krime korrupsaun). CAC mai hala’o programa sensibilizasaun ida ne’e tamba ita (CAC nu’udar amigu di’ak funsionariu públiku Timorense) lakohi atu administradór no dirijente sira monu ba prátika korrupsaun,” Komiariu Adjunto Luis esplika ba partisipante sira.

“Lei MPCC nu’udar estadu nian (esforsu) ne’ebé tula ba iha Timoroan ida-idak nian kabas leten nu’udar responsabilidade atu identifika rísku husi aktus korupsaun nian,” Komisariu Adjunto Luis Sampaio hatutan teni.

Ba lider foun Autoridade Munisipiu Liquica nian, Luis Sampaio akonsela oinsá superior munisipál sira buka mekanizmu no solusiona moras sosiál korrupsaun ida ne’e atu la eziste iha administrasaun públiku nian.

Komisariu Adjuntu Luis Sampaio afirma katak, implementasaun Lei MPCC obriga ajénte públiku sira husi nasionál too ba iha munisipis no postu administrativu sira atu deklara sira ninia rikusoin ba iha CAC bainhira assume kargu ruma.

Iha programa sensibilizasaun ne’e, Komisariu Adjunto Sampaio esplika mós ba partisipantes sira kona-ba Lei Nú 8/2009, 15 Jullu estabelesimentu CAC nian ne’ebé haraik kompeténsia ba CAC hodi hala’o asaun prevensaun no investigasaun kriminál ba krime korrupsaun.

Sosializasaun lei MPCC ba direjente sira iha Munisipiu Liquiça nu’udar meius edukasaun ida atu bele eleva koñesimentu ajénte públiku no sai nu’udar bukae hodi hasees-an husi rísku korrupsaun nian no serví estadu povu ho integridade aas.

Autoridade Munisipiál Liquisa hato’o apresiasaun ba ekipa Komisariu Adjuntu no Ekipa EAK-CAC nian hodi partilla Lei MPCC nu’udar bukae ida ba autoridade munisipál nian atu servi povu ho integridade, akuntabilidade no transparánsia iha funsionamentu administrasaun públiku nian iha futuru. (*)

Permanent link to this article: http://cac.tl/2022/04/programa-sensibilizasaun-lei-mpcc-atu-fo-hanoin-fp-la-monu-ba-krimi-korrupsaun/