“Lei MPCC Obriga Ajénte Públiku Deklara Rikusoin, Lakohi Deklara Simu Konsekuénsia” Komisariu Sergio

Dili- Komisariu Comissão Anti-Corrupção (CAC) Sergio Hornai re-afirma ezijénsia Lei Nú. 7/2020-Medidas Prevensaun no Kombate Korrupsaun (MPCC) katak, la iha ona tempu ba servidór Estadu sira atu diskute no halo negosiasaun kona-ba deklarasaun rikusoin nian.

Agora tempu ona atu ajénte públiku sira obrigatoriamente tenke kumpre de’it ba lei MPCC hodi deklara nia rikusoin mai iha CAC no Tribunál Rekursu.

Komisariu Sergio ko’alia lia hirak ne’e ba kargu dirijente no funsionáriu sira iha Ministériu Saude bainhira hamutuk ho Komisariu Adjuntu Luis Sampaio no ekipa tékniku DRBI kumpre konvite Ministra Saude nian ba hala’o aprezentasaun Sistema Plataforma online kona-ba Deklarasaun Rendimentu, Bens no Interese (DRBI) iha edifisiu Palásiu Sinzas, Caicoli Dili, Tersa-feira (1/3).

La iha ona tempu ita atu diskute, ne’e lei ita tenke kumpre. Hakarak ka lakohi, ita boot sira ho ha’u komprimenta de’it ba lei ne’e. Deklara ita boot ninian mai iha CAC no ha’u sei deklara ha’u nian ba iha Tribunál (Rekursu)”, katak komisariu Segio.

“Ita la diskute kona-ba lei. Ida ne’e tempu ona ita halo aplikasaun ba lei. Karik iha tempu ruma mak ita halo fali diagnostika ruma hodi reaktualiza. Agora ita husik la’o to’o tinan lima mai mak ita avalia. Ninian vantajen no desvantajen iha ne’ebé no ita sei bele halo melloramentu,” Komisariu Sergio hatutan teni.

Komisariu Sergio haktuir liu tan katak, ba tribunál dehan lei atu kumpre no halo tuir de’it lei MPCC no la iha tan negosiasaun entre deklarante no autoridade kompetente sira.

Lei mak nune’e! rigór ka fleksivel? lei ne’e rigór! Iha autoridade ka la iha? Lei iha nia autoridade! Ohin itrua tur hamutuk, aban ha’u bele hatudu liman ba ó, ó ba tur iha ne’eba. Pasénsi!, mas tenke ho objetividade no legalidade. Tan ne’e, lei ne’e obriga ita kumpri, la iha tan negosiasaun. Posteriormente, ita haree nia esesu sira, no agora, ita so kumpre no kumpre de’it”, hakotu komisariu Sergio. (*)

Permanent link to this article: http://cac.tl/2022/04/lei-mpcc-obriga-ajente-publiku-deklara-rikusoin-lakohi-deklara-simu-konsekuensia-komisariu-sergio/