Komisariu Adjuntu Luis : Lei MPCC fò Kompetènsia CAC Intervein Prosesu Rekrutamentu Funsionariu no hatuur politika rotasaun kargu xefia sira

Liquisa- Komisariu Adjuntu Luis Oliveira Sampaio iha nia servisu sensibilizasaun ba funsionariu no autoridade sira iha Munisipiu Liquisa hatete, lei MPCC fó mós kompetensia ba CAC kona-ba matadalan rekrutamentu setór públiku inklui prosedimentus adekuadu ba selesaun no formasaun ba funsionariu sira ne’ebé okupa kargu funsionariu públiku sira.

Tuir Komisariu Adjuntu Luis, problema sèriu iha administrasaun públiku liga ho asuntu rekrutamentu setór públiku ba selesaun no formasaun funsionariu sira katak, maske iha lei barak ne’ebé produs husi CFP hodi asegura rekrutamentu públiku transparante, asesivel ba ema hotu, no presiza priense rekezitu hodi ba tur iha pozisaun (kargu relevante sira), maibé iha prátika durante ne’e, konsientemente katak, ladun másimu no totalmente kompleta. Nune’e iha lei MPCC ne’e fó mós kompetensia ba CAC kona-ba matadalan rekrutamentu setór públiku inklui prosedimentus adekuadu ba selesaun no formasaun ba funsionariu sira atu nune’e iha futuru bele hola mós interveinsaun ba asuntu refere.

“Lei ne’e fó kompetensia ba CAC atu aban bainrua bele intervein sasan sira ne’e la’o ona ka lae? La’os atu ba karik, Bahasa dehan mengurui, maibè ita hamutuk hotu haree, se lei ne’e iha tanbsa la tuir. Prosesu rekrutamentu iha tanba sá? Formasaun ne’e iha tnbasa mak ida ne’e mak ba hela de’it? Seluk la iha oportunidade, entaun ida ne’e mak atu asegura” Komisariu Adjuntu hatete lia hirak ne’e iha àmbitu sensibilizasaun lei MPCC ho tema Hasa’e Koñesimentu Ajente Públiku Kona-ba Lei MPCC iha Salaun Administrasaun Munisipiu Liquisa, tersa-feira (21/09).

Ba Komisariu Adjuntu, produs sistema mak importante ba estadu, bainhira sistema funsiona ona, bele asegura katak, se mak ba iha ne’eba hodi hala’o nia responsabilidade?

“Iha sosiedade tranzitoria ba estadu direitu demokratiku, ita terlalu terlena ho maun boot sira, dalaruma ita hakat dook tiha, la depende ba Sistema, ita depende fali ba figura, ne’e mak oho ita ne’e. Se ema boot ne’ebé mak influensia ne’e mak ita depende, aban bainrua nia la iha, ita oho malu. Husi Sistema ne’e ita harii, nia padraun mak ne’e”.

Nia hatutan,hanesan lei, nia akumula estandar no elementu sira fundamental ne’e, ne’ebé bele figura sira la iha ona mós estadu ne’e sei la’o ba oin. Se imajina lara metin ba figura sira, bainhoira la iha, ita sira ne’e bele oho malu. Tanba sè mak atu rona sè? Tanba Sistema ita la ba ona. Ne’ebé importante mak aban bainrua Sistema sira ne’e bele funsiona.

Lei MPCC hatuur politika no regra rotasaun regular ba kargu xefia sira

Buat seluk ko’alia kona-ba hatuur politika no regra kona-ba rotasaun regular ba ema ne’ebé okupa iha kargu xefia, no nesesidade atu implementa programa formasaun regular ba agente públiku sira.

“Ida ne’e nia penekanan katak, kargu xefia sira ne’e labele tur metin iha fatin liu tinan 8 no 10. Esperiensia sira kotuk, balun tur iha fatin estrateziku no importante hanesan kaer osan ne’e tinan barak nia laran, ne’e labele tanba lei mak dehan”.

Tanba sa labele? Tuir Adjuntu Luis katak, “Lei dehan tenke iha rotasaun, alein de iha oportunidade, iha mós inspirasaun foun, matenek foun, para bele hadi’a Sistema ne’e, se ema ne’e mak iha de’it fatin ne’e, se nia hatene di’ak, maibè nia matenek mós oituan de’it, ida ne’e mak nia sei uza. Mas ema foun sei iha inisiativa foun, kreatividade foun, atu bele lori Sistema ne’e ba oin ba seksaun ka diresaun ne’ebé nia kaer. Ne’ebé lei ne’e ezize formasaun regular ne’ebé intensive regular ba funsionariu sira”, Adjuntu Komisariu nian akresenta ba funsionariu sira ne’ebé ho entuziasmu no pasensia hodi rona sosializasaun Lei MPPC ne’e.

Permanent link to this article: http://cac.tl/2022/04/komisariu-adjuntu-luis-lei-mpcc-fo-kompetensia-cac-intervein-prosesu-rekrutamentu-funsionariu-no-hatuur-politika-rotasaun-kargu-xefia-sira/