Komisario Sergio husu Universitáriu Foun UNPAZ Kontribui Prevene Aktus Korrupsaun ho Estuda no Disiplina

Dili – Komisariu Comissão Anti-Corrupção (CAC) Dr. Sergio Hornai husu ba universitariu foun Universidade da Paz (UNPAZ) atu estuda makaas no hatudu disiplina hodi kontribui iha luta kolektiva prevene no kombate korrupsaun iha rai doben Timor-Leste.

Komisario Sergio hato’o lia hirak ne’e ba universitariu sira bainhira sai oradór iha atividade palestra iha orientasaun akadémika UNPAZ nian anu akademinku 2021-2022, sexta-feira (4/3) ohin

Komisariu Sergio ko’alia ba otas-foun sira ne’ebé hala’o estudu iha ensinu nível universidade UNPAZ atu estuda halo didi’ak, tanba ho estuda makaas sei loke universitariu sira nia orizonte no koñesimentu ida luan ba prevene no kombate korrupsaun hodi dignifika povu no estadu Timor-Leste iha sosiedade mundiál.

Komisariu sergio ko’alia ba universitariu sira, atu hamriik kontribui ba asaun prevensaun kombate korrupsaun. Asaun kontribuisaun ne’ebé universitariu sira tenke halo mak estuda no tenke fó opiniaun kritiku hodi muda mentalidade sosiedade nian ne’ebé sei fó prioridade ba interese privadu hodi privatiza rikusoin hotu estadu nian.

Ita boot sira tenke estuda makaas, berani atu ko’alia no halo kritika barak liu husi ita boot sira nia universidade, liu husi seminariu sira no tenke fó opiniaun barak liu husi média kona-ba hahalok korrupsaun nian iha Timor-Leste”, katak Komisariu Sergio.

Komisariu Sergio hatete mós katak, sosiedade agora liu-liu universitariu sira tenke kreativu, inovativu no sivilizadu. Universitariu sira tenke mai ho baze étika ne’ebé forte, no baze siénsia ne’ebé krítiku no libertadu, nune’e kontribui idea ba estadu bele halo esforsu hotu hodi hametin sistema judisiál ida di’ak, nune’e kontribui ba prevene no kombate korrupsaun.

Alein ne’e, Komisariu Sergio ko’alia mós ba universitáriu sira katak, atu halo prevensaun di’ak liu ba aktus korrupsaun iha otas foun sira nian tempu agora la’os de’it estuda, maibé tenke hatuur mós hahalok disiplina iha univeridade no sosiedade, tanba hahalok ne’ebé la iha disiplina iha sosiedade sei kauza ba aktus korrupsaun nian buras liu tan iha futuru.

“Medida ba prevensaun korrupsaun ida mak disiplina. Disiplina en termus iha respeita tempu, respeita sasan ema barak nian, no respeita ba lei no normas sira ne’ebé iha sosiedade. Tanba aktus sira ne’e kontribui ba prevene korrupsaun no hatudu estadu ida forte no sustentavel,” Komisario Sergio subliña. (*)

Permanent link to this article: http://cac.tl/2022/04/komisario-sergio-husu-universitariu-foun-unpaz-kontribui-prevene-aktus-korrupsaun-ho-estuda-no-disiplina/