“Estudante Futuru Lider Nasaun TL Tenke Estuda Maka’as no Hadook-An husi Lia bosok” DG Rosario

Metinaro- Diretor Geral (DG) Diresaun Prevensaun no Sensibilizasaun (DPS) iha Comissão Anti-Corrupção (CAC) Rosario de Araujo Salsinha hateten estudante nudar future lideransa nasaun doben Timor-Leste (TL) tenki prepara-an sedu hodi konsentra estuda maka’as no domina siénsia barak nune’e bainhira to’o tempu simu taru estafeta lideransa nasionál nian preparadu ona ho matenek no hadook-an husi lia-bosok no monu ba aktu korrupsaun.

DG Rosario kasu lia hirak ne’e ba estudantes Snsinu Sekundáriu 20 Setembru Metinaro Dili iha loron Kinta-feira (3/2) semana ne’e wainhira halao programa sensibilizasaun no prevensaun korrupsaun sedu ba estudante sira iha eskola ne’e.

“Estudante ensinu sekundáriu 20 Setembru Metinaro nu’udar jerasaun foun ba lideransa estadu RDTL nian iha future, tenke fó-an tomak estuda makaas no sai ezemplu di’ak ba eskola sira seluk hodi dehan lae ba korrupsaun iha rai doben Timor-Leste”, katak Diretor Geral Rosario ba estudantes sira.

Ba estudante Metinaro oan sira, Diretór Geral Rosario dezafia estudantes sira ne’ebé sei otas nurak atu prepara-an ho kualidade, domina siensia ho kompetitivu hodi hasoru loro matan foun dezenvolvimentu nasionál Timor-Leste nian ne’ebé sei mai.

“Estudante sira tenke estuda ho loloos, haka’as-an, habrani-an ho hanoin kritikus hodi ko’alia problema sosiál no kona-ba luta foun Timoroan sira nian iha tempu Ukun Rasik-An kontra korrupsaun nian,” Diretor Geral Rosario sublinha. (*)

Permanent link to this article: http://cac.tl/2022/04/estudante-futuru-lider-nasaun-tl-tenke-estuda-makaas-no-hadook-an-husi-lia-bosok-dg-rosario/