Ekipa Investigador CAC Enkamiña Objetu Apreensaun ba Prokurador Tutelar

Pante Makassar – Ekipa Investigador Comissåo Anti-Corrupcão (CAC) tutelar ba operasaun ezekuta mandadu buska no apreensaun Tribunál Distritaál Oecusse nian Kinta-feira (20/1) ohin ofisialmente enkamiña objetu apreensaun ne’ebé hala’o iha loron Tersa-feira (18/1) semana ne’e ba iha prokurador tutelar iha edifisiu Prokurador Distritál Oecusse, Pante Makassar.

Objetu apreensaun hirak ne’e enkamiña diretamente husi investigador CAC tutelar Natalino Sarmento no Horacio Lopes ba prokurador ne’ebé kaer kazu ne’e no akompaña husi Polisia Nasionál Servisu Investigasaun Kriminal (PNSIK) Nasional nian.

Iha operasaun buska domisiliaria no apreensaun semana ne’e, investigador CAC sira halibur no prende objetu krimi hanesan dokumentus komprovativus manan projeitu cleaning service iha RAEOA Oecusse, konta bankaria, kareta rua (2), telephone, laptop, osan mean, osan cash ho montante boot, dokumentus kompanha nian, no dokumentus kona-ba projeitus electrifikasaun no projeitus balun iha RAEOA/ZEESM ne’ebé suspeitu ho ninian espoza nian kompaña manan nu’udar evidénsia no objetivu krimi. 

Hafoin enkamiña objetu apreensaun ba prokurador, sei hetan validasaun husi Juiz Distritál Oecusse no enkamiña fila mai CAC hodi hahú hala’o investigasaun kriminál ba suspeitu no ema sira ne’ebé intervienente prosesuál nian.

Durante operasaun buska no apreensaun iha loron Tersa-feira (18/1) ne’e investigador CAC lidera husi Diretor Investigasaun Kriminál Emilio Quintas obrigado tenki estraga propriedade suspeitu nian balun iha edifisiu kompanha cleaning service nian iha Pademau Pante Makassar tamba savi armari la iha no oras tuir mandadu juiz nian besik termina.

Mandadu Tribunál Rejiaun Administrativa Espesiál Oecusse Ambeno (RAEOA) Oecusse nian ho númeru NUC 0057/21.PDOEC data loron 17/12/2021 ne’e fó orden mai CAC no kumprimentu efetivu ba mandadu ida ne’e IHA AUTORIZASAUN ba asesu iha dependensia hotu-hotu, inklui kofre, fatin hirak rai sasan nian, veiklu hirak ne’ebé uza husi suspeitu, bele fera odamatan, hakat sae husi moru no neutraliza animál sira, se presiza duni, ho observansia ba dispozisaun iha artigu 169 no 170 husi KPPTL. 

Suspeitu no familia Jerente Senior Rejiaun Administrativa Espesiál Oecusse Ambeno (RAEOA) Oecusse kolabora di’ak halo fásil ekipa investigador Comissåo Anti-Corrupcão (CAC) nian konklui operasaun buska no apreensaun iha oras 12 nian laran. Mandadu ho númeru NUC 0057/21.PDOEC data loron 17/12/2021 ne’e fó orden ba CAC halao operasaun durante oras 12 nian laran iha fatin tolu (3) diferente; rezidensia no garajen kareta Jerente Senior ZEESM iha Sikluli no edifisiu kompaña nian iha Pademau, Pante Makassar.

Ekipa investigador ne’ebe lidera husi Diretor Investigasaun Kriminál (UIK) Emilio Quintas akompaña ho Polisia Nasionál Servisu Investigasaun Kriminál (PNSIK) Nasionál ne’e hahú iha tuku 8;00 OTL dadersan no termina iha tuku 20;00 OTL kalan tuir lei.

Alemde operasaun ne’e hetan kolaborasaun di’ak husi suspeitu na’in rua ho ninian familia, hetan mós akompañamentu prokurador titulár no Juiz Dr. Yudi Pamungkas husi inisiu to’o termina kalan.

Operasaun buska no apreensaun ida ne’e nu’udar operasaun dahuluk liu CAC hala’o iha munisipiu sai husi kapitál Dili iha istória CAC nian hafoin estabelese no hahú operasaun iha tinan 2010 liu ba bazeia ba mandatu Lei Númeru 8/2009 15 Jullu. (*)

Permanent link to this article: http://cac.tl/2022/04/ekipa-investigador-cac-enkamina-objetu-apreensaun-ba-prokurador-tutelar/