Featured Stories

Lider no Autoridade Lokal Munisipiu Dili Nain 200 Resin Partisipa iha Seminariu Prevene no Kombate Korrupsaun

by

Dili – Comissāo Anti-Corrupção (CAC) no Prezidenti Autoridade Munisipiu Dili realiza seminariu konjunta loron sorin ho topiku “papel Lider Komunitaria ba Prevene Korrupsaun” ba autoridade lokal no lider komunitaria sira liu nain 200 ne’ebé partense ba Autoridade Munisipiu Dili nian iha loron Segunda-feira (31/8) ne’e iha Sentru Formasaun Judisiariu Caicoli Dili.

Seminariu ne’e loke ofisialmente husi Prezidenti Autoridade Munisipiu Dili Dr. Gaspar Soares no partisipa aktivamente husi lider local no komunitariu hirak ne’e mai husi Postu Administrativu lima (5); Vera Cruz, Nain Feto, Don Aleixo, Metinaro no Atauro ho sukus hamutuk 36.

Seminariu ne’e ho objetivu mak atu habelar informasaun kona-ba papel CAC nian aumesmu tempu aprezenta mos relatoriu monitorizasaun CAC nian ba subsidiu agregadu familiar, motiva partisipasaun entidades hotu oinsa atu tula kamada ba malu iha luta prevene no kombate korrupsaun iha Timor-Leste.

Rezultadu monitorizasaun ne’e foka ba iha situsaun tolu: IDA, kona-ba oinsa prosesu pagamento ne’e kumpri regras sira, RUA kona-ba protokolu distansiamentu sosial, TOLU kona-ba risku potensial sira ba falsifikasaun dadus fixa familiar no pratika diak sira.

Komisariu Commissão Anti Corrupçao (CAC) Dr. Sergio Hornai iha ninian intervensaun lori Komisaun ninian naran espresa laran haksolok no agradesimentu ba partisipasaun maksimu lider local no lider komunitariu Munisipiu Dili nian ne’ebé maske iha loron toleransia do pontu maibe espiritu liders iha baze nian ho antusiasmu boot mai partisipa aktivamente iha seminariu ne’e too nian rohan.

Moderador ba seminariu ne’e mak Diretor Geral Prevensaun no Sensibilizasaun Dr. Rosario de Araujo no aprezenta orador principal nain hat (4) mak Komisariu Commissão Anti Corrupçao (CAC) Dr. Sergio Hornai, Komisariu Adjunto ba Asuntu Prevensaun no Sensibilizasaun Dr. Luis de Oliveira Sampaio, Prezidenti Autoridade Munisipiu Dili Dr. Gaspar Soares. Aprezentador ba “Relatoriu Monitorizasaun CAC nian ba Subsidiu Agregadu Familiar” mak Chefe Unidade Estudu Avaliasaun no Risku Dr. Cirilio Abi.

Alemde Administrador Postu nain lima mak partisipa iha seminariu ne’e, atende mos Diretor Jeral Servisu Apoiu Kooperasaun (SAK) Dr. Carlos Bento Mau Bere, Diretor Investigasaun Dr. José Verdial, Diretor Informasaun no Seguransa Dr. Euclides Madeira ho estrutura Komisaun Espesialista Anti Korrupsaun (EAK) sira.

=====================================================================

Komisariu CAC Sergio Agradese ba Autoridade Munisipiu Dili Kolabora Hamutuk Realiza Seminariu Prevensaun Korrupsaun

Dili – Komisariu Commissão Anti Corrupçao (CAC) Dr. Sergio Hornai lori estrutura Komisaun nian tomak agradese ba Prezidenti Autoridade Munisipiu Dili Doutor Gaspar Soares, Administrador Postu nain lima (5), Chefe Suku, Chefe Aldeias ho ninian estrutura hotu, inkluindu reprezentante Polisia Nasional Timor-Leste (PNTL) liu 200 iha Seminariu loron sorin halao iha Sentru Formasaun Judisiariu Caicoli Dili iha loron Segunda-feira (31/8).

“Hau hakarak lori Comissão Anti-Corrupção ho estrutura tomak agradese ba Nai no Lou sira, liu-liu Chefe Suku sira, hau nian bin sira ne’ebé mak disponibiliza ita boot sira nian tempu hodi bele mai hamutuk ho Prezidenti Autoridade, Nai Postu Administrador sira mai ita fahe malu oituan koalia kona-ba papel lider komunitaria ninian iha kombate kriminalidade korrupsaun iha ambitu COVID-19 ninian,” Katak Komisariu CAC Dr. Sergio Hornai iha Seminariu ne’e.

Komisariu Sergio mos hatoo parabens ba Timoroan hotu iha loron importante no determinante iha Timoroan sira historia luta libertasaun nasional nian ne’ebé termina ho Konsulta Popular realiza iha loron loron 30 fulan Agosto 1999 no tinan ne’e ita komemora ba dala 21.

“Maske tuir ajenda Estadu nian loron 31 Fulan Agosto nudar loron toleransia de pontu ba servidor povu nian maibe espiritu nasionalismu ba rai ida ne’e, Prezidenti Autoridade Munisipiu Dili ho ninian estrutura tomak too baze halo afirmasaun ida hodi transfere ba iha konvite sira ne’ebé mak Komisaun ho Prezidenti Autoridade Munisipiu Dili hasai.

“Agradese ba Nai ho Lou Chefe Suku no Chefe Aldeia sira ne’ebé , kumpri ita ninian dever sira hodi husik problema particular ninian mai halo servisu asuntu publiku ninian,” Komisariu sublinha.

Komisariu Sergio enkoraja autoridade Timorense atu reafirma fila fali Timoroan ninian pozisaun hodi kontribui tuir idak-idak nian badaen ba povu no nasaun Timor nian diak.  Saida mak Timoroan ida bele halo ba rai ida ne’e nudar Chefe Suku, Chefe Aldeia, Prezidenti Autoridade, Komandante Distritus, Komisariu, Adjunto Komisariu, Diretor Jeral, Diretor Nasional, Chefe Unidade atu halo saida ba rai ida ne’e?

Iha tempu independensia katak Komisariu Sergio Timoroan sira simu fali responsabilidade ida para atu halo saida? Atu dinamiza Timoroan sira nian hanoin para atu kontribui ba iha boa-governasaun oinsa Timoroan ida bele kontribui kombate ba kriminalidade korrupsaun iha rai laran. (*)

Previous postCAC Sorumutu ho Vise-Primeira Ministra no Vise MInistra MSSI Konaba Relatoriu Deskobrementu Implementasaun Subsidiu Fundu Agregadu Familiar Next postCAC no Autoridade Lokal iha Dili Konsolida Forsa Avansa Prevene no Kombate Korrupsaun

Popular

Lider no Autoridade Lokal Munisipiu Dili Nain 200 Resin Partisipa iha Seminariu Prevene no Kombate Korrupsaun