Featured Stories

Lei Difamasaun Bele Prejudika Luta Prevene no Kombate Korrupsaun iha TL

by

Dili – Komisariu Adjunto ba Asuntu Prevensaun no Sensibiliasaun Comissão Anti-Corrupção (CAC) Dr. Luis de Oliveira Sampaio hatoo Komisaun nian diskordansia ba proposta VIII Governu Konstitusional nian kona-ba Draft Lei Kriminaliza Difamasaun.

Diskordansia Komisaun nian ne’e Komisariu Adjunto Luis Sampaio hatoo ba Ministro Prezidensia Konselhu Ministro Dr. Fidelis Magalhaes wainhira Komisaun ba aprezenta “Relatoriu Deskobrementu Implementasaun Subsidiu Fundu Agregadu Familiar” Segunda-feira (7/9) iha Palacio Governu Dili.   

Ami mos akompanha informasaun iha sosiedade liu-liu NGO sira kona-ba politika Estadu atu introdus Lei Difamasaun. Tuir pontu de vista prevensaun nian lei ida ne’e mos bele ariskus ba ita ninian komitmentu Estadu nian iha politika kombate korrupsaun,” Katak Komisariu Adjunto Luis Sampaio ba Ministro Dr. Fidelis Magalhaes.

Komisariu Adjunto Sampaio hatutan teni Senior Management CAC lori Komisaun nian naran agradese ba esforsu Estadu Timor-Leste nian liu husi Parlamentu Nasional halo ona lei no Prezidenti Republika promulga tiha ona Lei Medidas Prevene no Kombate Korrupsaun (MPCC).

Iha tempu hanesan governu mos introdus lei kriminaliza difamasaun ho rajaun atu eduka sidadaun Timorense hodi respeita lider sira. Maibe, Komisaun argumenta katak Lei Kriminaliza Difamasaun sei sai bareira forte ba Timoroan sira liu-liu funsionariu publiku sira atu hatoo keixa kona-ba indisus krimi korrupsaun akontese iha instituisaun publiku ne’ebé envolve jestor senior no politiku nain sira.

“Mesmu politika gvernu nian atu eduka sosiedade hodi bele respeita ninian nai ulun sira. Mais, ami (Komisaun) haree husi aspeitu seluk lei ne’e bele taka dalan ba ema liu-liu funsionariu publiku tauk kuandu suspeita buat ruma, ninian superior sira halo buat ruma (la los), sira tauk atu halo keixa tamba bele hetan kadeia ka prizaun kuandu nia levanta ida ne’e,” Katak Komisariu Adunto Sampaio ba Ministro Fidelis.

“Ida ne’e ami nian hanoin hodi hatoo para bele konsidera hela tamba ida ne’e bele prejudika politika Estadu tomak ninian (iha luta kontra korrupsaun). (*)

Previous postCAC Apela Pesoal Des-Honestu Fo Fila $200 Voluntariamente ka CAC Halo Aksaun Represivu Next postSenior Management CAC Aprezenta Proposta OGE Komisaun nian ba KROP

Popular

Lei Difamasaun Bele Prejudika Luta Prevene no Kombate Korrupsaun iha TL