Featured Stories

LAK Sei Hatudu Timor-Leste Ninian Integridade Nudar Estadu Soberanu

by

Dili – Prezidenti Komisaun A Parlamentu Nasional (PN) ba Asuntu KOnstitusional no Justisa Deputadu Joaquim dos Santos Boraluli hateten Lei Prevensaun no KOmbate Korrupsaun ka Lei Anti Korrupsaun (LAK) wainhira PN aprova no Prezidenti Republika promulga, sei hatuut no hatudu rai Timor-Leste ninian integridade nudar Estadu soberanu.

Lia hirak ne’e Deputadu Boraluli hato’o hafoin ensera diskusaun maratona Projeto LAK iha loron Kinta-feira (9/7) iha Aisirimou Munisipiu Aileu. 

“Ita sei kontaktu malu para bele halo mudansa ba buat ruma. Ita iha kontaktu permanente para servisu nee ita hamutuk bele rezolve problema korrupsaun ne’ebé hatudu ita ninian integridade hanesan Estadu,” Katak Prezidenti Komisaun A PN Deputadu Boraluli.    

Deputadu Boraluli hatutan teni servisu formulasaun projeto LAK ho meius diskusaun maratona ho entidades relevantes iha rai laran no deputadu sira halao estudu komparativu iha rai liur durante tinan rua nian laran remata ho susesu iha fatin historiku Aisirimou Munisipiu Aileu.

Hafoin diskusaun nee Komisaun A PN sei lori ba iha plenaria PN hodi halo votasaun final global ne’ebe tuir ajenda sei realiza iha loron Segunda (20/7) aban. 

“Ita ninian servisu halo LAK durante tinan rua (2) too mak iha ohin nee, remata iha ohin nee. Ita lori fali ba iha Parlamentu Nasional atu aprova no lori ba iha Prezidenti Republika promulga. Ita hein kuandu Prezidenti Republika promulga (LAK) Timoroan sira tenki kumpri, Deputadu Boraluli afirma.

 “Ita mak sei servisu hamutuk atu rezolve problema korrupsaun iha ita ninian rai. Buat hot-hotu neebé tau iha lei, ita sei kumpri para ema seluk sei halo tuir ita ninian hahalok,” Katak Prezidenti Komisaun A PN Deputadu Joaquim dos Santos Boraluli.

Tuir ajenda PN nian, iha loron Segunda-feira (20/7) aban, Parlmentu Nasional Timor-Leste (TL) sei RE-AJENDA VOTASAUN FINAL GLOBAL ba Projeto Lei Anti-Korrupsaun ka ho titulu foun “Medidas Prevensaun no Kombate Korrupsaun”.

Informasaun nee fo sai husi Sektretariadu Tekniku Komisaun A Parlamentu Nasional nian iha loron Tersa-feira (14/7) semana kotuk hafoin PN kansela primeiru ajenda ho razaun katak iha tan proposta tolu (3) husi deputadu sira atu haforsa liu tan LAK neebé tama iha sekretariadu Komisaun nian.

Re-ajenda tuir informasaun fo sai husi Sektretariadu Tekniku Komisaun A Parlamentu Nasional nian katak iha tan proposta tolu (3) husi Deputadu David Dias Ximenes Mandati ho deputadu sira seluk hodi reforsa tan lei nee.

Prezidenti Kommisaun A PN ba Asuntu KOnstitusional no Justisa Dr. Joaquim dos Santos Borluli iha Aisirimou deklara ona sei servisu hamutuk ho entidades relevante hotu atu rezolve problema korrupsaun iha Timor-Leste hodi aselera aproasaun no promulgasaun ba lei nee iha tinan ne’e molok PN deskuti no aproa Orsamento Geral Estado (OGE) 2020 nian. (*)

Previous postMSSI Aluga Kareta Iha Indisus Familiarismu Sei Halo Averiguasaun Tuir Lei (ALERTA ba Benefisiariu LA ELIJIVEL Fo Fila Osan Estadu ka Simu Konsekuensia) Next postKomisaun CAC Dr. Sergio Hornai, “CAC sei Implementa LAK Tuir Prinsipiu Legalidade ho Efetivu no Efikas”

Popular

LAK Sei Hatudu Timor-Leste Ninian Integridade Nudar Estadu Soberanu