Featured Stories

Ronde IV Diskusaun Projeto LAK; Deputadu no Konvidadus Elimina Artigu 21, Avansa Deskuti artigu 22

by

Aisirimou – Diskusaun Ronde IV Projeto Lei Anti-Korrupsaun (LAK) hahu fila fali ona iha fatin historiku ba luta armadas hamutuk ho povu no nasaun doben Timorense Aisirimou Munisipiu Aileu loron Tersa-feira (7/7) ne’e. Deputadu sira desidi elimina artigu 21 no avansa ba diskusaun artigu 22 Kapitulu IV Projeto LAK.

Senior Management Commissão Anti Corrupçao (CAC) lidera husi Komisariu Dr. Sergio Hornai, Komisariu Adjuntu nain tolu (3); Dr. Augosto Castro, Dr. Luis Sampaio, Dr. Alexandre Freitas akompanha husi Asesora Juridika Komisaun Dra. Mariman Oliveira mai atende kontinuasaun diskusaun Projeto Lei Anti-Korrupsaun (LAK) IV Ronde.

Loron dahuluk IV Ronde diskusaun esbosu LAK nee hahu iha Seccao III DOS OUTROS CRIMES DE CORRUPCÃO hodi halo eliminasaun ba iha artigu 21; FALTA DE DECLARACÃO DE BENS, RENDIMENTOS E INTERESES.
Proposta hodi substitui no elimina ba iha artigu 21 nee mai husi Nai Deputadu nain tolu (3); Nai Deputadu Francisco Miranda Branco, Dario Madeira (FRETILIN) no Nai Deputada Carmelita Caetano Moniz (CNRT). Artigu nee Deputadu nain tolu propoin ba eliminasaun tamba iha repetisaun ka dobru ba artigu 21 ne’ebé kontempla ona iha Kapitulu III “REGIME DE DECLARACÃO DE BENS, RENDIMENTO E INTERESES”.

Molok deputadu sira halo eliminasaun ba artigu nee ho votasaun, prezidenti meja diskusaun LAK Nai Deputadu Joaquim dos Santos Boraluli fo tempu ba proponent ida halo justifikasaun no Nai Deputada Carmelita Moniz reprezenta deputadus proponents halo leitura ba tekstu substituisaun.

“Obrigada Prezidenti (Deputadu Joaquim Boraluli). Artigu ida ne’e tamba hanesan tiha ho artigu ida neebe tuir justifikasaun sumaria ida ne’ebé kontempla tiha ona iha REGIME DE DECLARACÃO DE BENS, RENDIMENTO E INTERESES ne’ebe ita aprova tiha ona,” Katak Nai Deputada Carmelita Moniz.
Hafoin ida ne’e, Deputadu nain sia (9) halo votasaun ba retirada artigu 21 ho votus UNANIMIDADE aprovadu .

Ho rezultadu votasaun afavor unanimidade ba retirada artigu 21 husi Projeto LAK ne’e, Prezidenti Komisaun A no prezidenti meja diskusaun Deputadu Joaquim dos Santos Boraluli kontinua lidera diskusaun ba artigu 22 hodi rona apresiasaun husi konvidadus husi instituisaun nakait sira.

Artigu 22 hatuur konaba POSSE DE RIQUEZA INJUSTIFICADA iha ne’ebé obriga servidor Estadu no povu doben Timor-Leste husi nivel Chefe Departamentu too ba iha Prezidenti Republika atu deklara no halo justifikasaun ba sira ninian rikusoi mai CAC tuir LAK Kapitulu III.

Tuir Prezidenti meja diskusaun Nai Deputadu Joaquim Boraluli argumenta Komisaun A presija rona apresiasaun husi konvidadus sir aba artigu 22 tamba tuir ninian rasasinu katak deputadu proponent sira nian hakarak introdus norma ida ne’e fokus deit ba iha entidades sira ne’ebé hetan fiar husi Estado hodi halao knar publiku husi niel Chefe Departamentu too ba iha Prezidenti Republika.

“Komisaun presija rona apresiasaun tamba lei ne’e vigor sei kona hotu ita husi Prezidenti Republika too mai iha Chefe Departamentu sira,” Katak Nai Deputadu Joaquim dos Santos Boraluli.

Komisariu Adjunto ba Asuntu Investigasaun Dr. Augusto Castro iha ninian intervensaun ba meja diskusaun katak artigu ida ne’e importante tebes tamba ilustra ukun nain hamutuk ho povu Timorense nian vontade no seriedade ba luta kontra korrupsaun iha nasaun doben Timor-Leste.

Tuir Komisariu Adjunto CAC katak artigu ida ne’e ninian ejijensia atu oinsa autoridade sira halo esforsu hamutuk atu kombate korrupsaun. Timor-Leste labele savi an iha sistema ida ne’ebé mak fo fatin ba iha haburas korrupsaun.

Komisariu Adjunto Augusto Castro saliente liu tan iha ninian intervensaun katak artigu ida ne’e ninian ejijensia atu oinsa Timoroan sira hamutuk ho autoridade anti-korrupsaun no judisial halo esforsu hamutuk iha luta sagradu kombate korrupsaun iha Timor-Leste.

“Parte husi efikasia investigasaun no afikasia aplikasaun lei nian! Hau hanoin ne’e sei iha efeitu diak liu duke ita (Timor) la iha (artigu 22). Desijaun iha distintus deputadu sira nian liman. Ida ne’e hanesan pontu ida krusial ejiji ita idak-idak nian konsiensia ho fiar katak Timor nee hakarak korrupsaun ou lae? Artigu ida ne’e ajuda tebes servisu CAC nian iha faze investigasaun para ba efeitu pena (represivu) no prevensaun (korrupsaun) nian,” Katak Komisariu Adjunto Augusto Castro.

Esbosu LAK ida nee importante tebes atu kompleta Lei Nu. 8/2009 15 de Julho kona-ba Estabelesimentu Comissão Anti-Corrupção (CAC) no Kodegu Penal TimorLeste nian hodi Komisaun halao servisu represivu iha esforsu luta kontra korrupsaun iha nasaun doben Timor-Leste.

Partisipa iha diskusaun intensive durante ne’e CAC, PCIC, PDHJ, no parte Ministeriu Justisa no Sosiedade Civil Timorense JSMP-FONGTIL.

Deputadu sira husi Komisaun A Parlamentu Nasionál Asuntu Konstitusionais no Justisa ne’ebé partisipa iha dikusaun ne’e mak hanesan Prezidente Joaquim dos Santos, Vise Prezidente Francisco de Vasconcelos, Sekretáriu José Pacheco Soares, Membru Francisco Miranda Branco, Dário Madeira, Patrocíno Fernandes, Carmelita Moníz, Óscar de Araújo no António Nobre Amaral Tilman.
Entidade relevante sira ne’ebé partisipa mós iha diskusaun ne’e mak hanesan Adjuntu Prokuradór Jerál Repúblika Alfonso Lopez, Estrutura CAC kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Komisáriu Adjuntu CAC ba asuntu Servisu Apoiu no Kooperasaun (SAC), Alexandre Freitas, akompaña husi Asesora Jurídika Mariman Oliveira, Diretór Polisia Sientifika Investigasaun Kriminál (PSIK), Vicente F. Brito, adjunta defensora jerál públika Olga Berreto Nunes no Asessór Jurídiku Komissaun A Parlamentu Nasionál, Anildo da Cruz ho Pedro Andrade.

Aisirimou nudar fatin historiku ba prosesu luta libertasaun nasional iha ne’ebé fundador Estado no nasaun Timor-Leste harii Forcas Armadas Libertação Nacional Timor-Leste (FALINTIL) hodi kontra okupasaun militar estranjeiru iha frente armadas.

Prezente Deputadus Komisaun A Parlamentu Nasional iha diskusaun serial nee hamutuk nain 10 husi Partidu FRETILIN, CNRT, PLP, KHUNTO, UDT-FRENTE MUDANCA inkluindu Nai Prezidenti Parlamentu Nasional Dr. Aniceto Lopes husi FRETILIN no excepto Deputadu Adriano do Nascimento husi PD tamba kondisaun saude. (*)

Previous postDeputadu no Konvidadus Hahu Deskute Kapitulu III Crimes de Corrupção Projeto LAK Next postDeputadu Muda Titulu LAK ba Medidas de Prevenção e Combate a Corrupção

Popular

Ronde IV Diskusaun Projeto LAK; Deputadu no Konvidadus Elimina Artigu 21, Avansa Deskuti artigu 22