Featured Stories

Rezultadu Monitorizasaun ho nia Deskobrementu Sira ba Semana Dahuluk Pagamento ba Apoiu Monetariu Agregadu Familiares (9-13 Juñu 2020)

by

Monitorizasaun ékipa konjuta  Provedoria dos Direitos Humanos e Justiça (PDHJ), Comissāo Anti-Corrupção (CAC), Comissão da Função Pública (CFP) no Inspector Geral do Estado (IGE), no rede apoiu husi membru organizasaun sociedade sivil (FONGTIL), estudante universitariu, organizasaun joventu sira, durante semana dahulu nian, ami konvida ita boot sira hotu, atu informa rezultadu prelimanariu husi prosesu pagamento ba apoiu monetariu agregadu familiar husi 9-13 Juñu 2020.

Rezultadu monitorizasaun ne’e sei foka ba situasaun tolu: 1) kona-ba Kumprimentu ba regra Estadu de-Emergencia (EE) no distansiamentu sosial; 2) kona-ba potensia risku sira hanesan korrupsaun, hanesan abuzu poder, kobransa ilegal, falsifikasaun dadus fixa familiar, no 3) kona-ba pratika diak sira.

Fatin monitorizasaun ; Kapital Dili, Munusipios sira hanesan: Manatuto, Ermera, Liquica, Aileu, Ainaro, Baucau, Maliana, Manufahi, no Viqueque nomos informasaun/keisa  sira ne’e ekipa CAC simu husi komunidade.

  1. Kumprimentu kona-ba regra distansiamenu sosial
  1. observa katak kuaze iha fatin hotu-hotu iha Dili laran no munisipiu sira, ekipa observador sira deskobre katak komunidade sira la kumpri  regras sira estadu emerjensia datoluk konaba distansiamentu social no la iha mekanismu propriu ida atu guia ekipa tekniku sira hodi introduz uluk regra no padraun kona-ba prevensaun covid 19 no protokolu distansiamentu sosial antes hahu pagamento;

PDHJ, CAC, IGE no CFP observa katak iha suku balun iha dader, sira aviza ba benefisiariu sira atu kumpri distansiamentu sosial, maibé iha fatin balun la iha informasaun ruma klaru kona-ba prevensaun moras covid-19 nian,

  • PDHJ, CAC, IGE no CFP mós observa katak la hare profisional saúde sira destaka iha sentru/fatin pagamento sira atu introduz protokolu prevensaun covid-19 ba benifisiariu/komunidade, pelo menus, iha/ba suku sira iha Dili laran ne’ebé ho populasaun/benifiariu boot;
  • Benifisiairu sira maioria la uja maskre no la iha fatin ba fase liman no so iha deit fatin ida-rua mak Xefe Suku sira esplika kona-ba distansiamentu sosial, fahe maskra no introduz regra prosidementu relevante ba prevensaun Covid-19 nian;
  • Iha fatin balun, tantu iha Kapital Dili no munisipiu sira pagamento hahu tarde, ate iha fatin balun foin hahu iha oras tuku 11 dader;
  1. Potensia falsifikasaun no kobransa iha suku sira

1. Dadus agregadus uma-kain no benifisiariu sira;

1.1 Ekipa observador sira deskobre katak iha problema  kona-ba dadus ne’ebé MSSI taka – públika iha suku sira tanba lista benifisiariu ne’e inklui funsinariu/diretor  sira ne’ebe simu  salariu mais ka superior $500, hanesan  asesor  sira, eis deputadus, dosente universitariu estadu/UNTL, Prokurator, Juis, ……etc.

Ida ne’e hatudu katak iha problema seriu/grave kona-ba kestaun baze-de-dadus ne’ebé produz husi MSSI no MAE; Se dadus funsionariu deit ne’ebé rejista ona iha sistema Seguransa sosial la bele kontrola/deteta oinsa ho dadu agregadus familiar ema baibain sira;

1. 2. Lista ne’ebe aprezenta husi autoridade lokal (suku/aldea) sira ho lista emitidu husi MSSI públika iha sede suku sira lahanesan tanba lista balun la mosu iha lista públikadu, lista benifisiariu sira barak mak lakon no iha aldea rua iha Dili laran mak lista la iha totálmente.

2. Potensia  ka tendensia iha falsifikasaun iha xefe suku/xefe aldea sira;

2. 1 Iha suku no aldeia balun, xefe suku no xefe aldeia sira fasilita joventude sira asesu ba fundu agregadu familiares ne’e maske sira seidauk forma familia.

2.2 Tantu iha Kapital Dili nomos munisipiu sira falsifika dadus agregadus familiar, tanba durante prosesu pagamentu ekipa konsege rejista benifiariu sira ne’ebe la elejível ,maibe juventu sira ne’e iha asesu ba fixa familia;

  • Ezemplu iha distritu balun, ékipa konsege hapara; benfisiariu nain  tanba seidauk forma uma fali ka klosan, no benifiariu sira seluk naran tama iha suku diferente; Aleinde ne’e ho kolaborasaun no kordenasaun ‘ekipa MSS, ekipa observador sira konsege kansela pagamentu ba benifisiariu sira ho redimentu superior $500, hamutuk emar ka uma – kain   20;
    • Iha benfisiariu balun naran iha lista maibe la iha kartau eleitoral ka sira nia naran eziste iha suku/munisipiu seluk, ezemplu iha suku, balun populasaun orijen iha suku ida, maibe kartaun eleitoral husi suku/munisipiu seluk (sira pagamentu sei pendente); signifika iha posibilidade sira nia naran bele rejista iha fatin 2 (dobru);
    • Eziste sidadaun orijen suku nian balu, maka naran la-iha lista no la-dauk iha kartaun eleitoral maibe autoridade lokal no ekipa pagamentu aseita sira nia deklarasaun hodi hetan pagamentu – Enkuantu iha Suku balu wainhira la-dauk iha kartaun eleitoral maka Xefe Suku kansela pagamentu, Situasaun ne’e, sai preokupasaun mos tanba seidauk hatene los sira sidaun TL nian ona ka seidauk.

3. Xefe Aldeia no Suku balun mos aseita atu hatama nia membru familia (oan), alin-feton, sobriñu ka relasaun familia besik sira  ne’ebá sei klosan sai mos benefisiariu (iha Dili nomos iha munisipiu sira);

4. Eziste iha suku balun halo deklarasaun ne’ebé halo konfuzaun ba publiku liuhusi media katak família ne’ebé  naran sai iha lista taka ka públikadu iha suku ne’ebé emar ne’e simu salariu superior  ho $500,00 (atus lima) bele hetan maibe presija halo asaun social ba ema kbiit laek sira.

5. Aldea no  Suku balun halo kobransa ba benifisiariu sira, ho montante diferente ho razaun oioin katak ko’a kustu adinistrasaun no transporte, realibilitasaun edisifiu suku, liuliu iha munisipiu sira. Iha kazu sira ne’e, ekipa tenta halo kordenasaun ho autoridade munisipal sira hodi atua/intervein imedita.

6. Suku balun, iha dader san autoridade lokal (xefe suku no aldeia) autoriza/ permite ékipa observador husi organizasaun sira ne’e bele akompaña prosesu pagamentu maibé iha loraik, sira buka maneira atu taka ka limita asesu ka espasu ba membru organizasaun sira ne’e.

7. Iha problema kona-ba interpretasaun loloos ba provizaun relevante ba benifisiariu sira – artigu 2 DK No. 15/2020. Ekipa MSSI bazeia ba orientsaun/formasaun ne’eb’e sira simu husi sira ninia ekipa formadores sira katak iha familia ida – laen ka aman nu’udar xefe familia mak nia salairiu menus husi $500,iha direitu ba fundu ne’e, mesmu ke ninia feen ka nia membru/elementu ida husi familia ne’e simu salario mensal superior $500. Maibé Dekretu-Lei la koalia kona-ba Xefe de-Familia maibé koalia kona-ba kualker membru familiar ida mak regularmente simu salario ka vensimentu superior $500 sira la iha direitu.

8. Ekipa obsevador sira mós deteta katak iha suku balun iha munisipiu balun  ninia aldea sira ho uma-kain uitoan deit no prosesu pagamentu bele halo hotu iha loron rua (2) ka tolu (3) nia laran maibé kareta aluga ba no perdiem ba ékipa servisu sira fiksa ba loron sanulu;

8. Ékipa sira mós deteta katak iha benfisiariu sira balun iha hela  estranjeiru hanesan Korea no Australia maibé sira ninia naran kuntinua taka iha lista sede suku sira, inklui benifisariu “mate klamar” ka mate ona, maibe naran kontinua iha lista benifisiariu.

9. Tuir Diploma Ministerial Nú. 18/2020 katak pagamentu sei realiza iha suku no aldea sira maibé ekipa sira deskobre katak pagamento sira kuaze halo deit iha suku, duke aldeã sira;

  1. Pratika diak sira
  1. Iha benefisiariu balun voluntariamente halo kontaktu ba Comissão Anti-Corrupção (CAC) hodi husu informasaun tanba sira nia salariu superior $500, maibe emar sira ne’e nia naran mósu iha lista ka livro benefisiariu. Iha balun volentarimente deside atu la simu, no balun ne’ebé mak seidauk simu, CAC sujere atu kansela, no sira ne’ebé mak simu ona, sei buka fali meius seluk hodi devolve;
  • Diretor Geral, MSSI no Diretor Munisipal MSSI Covalima, ativamente halo kontaktu ho CAC no halo atuasaun imediata ba kazu sira CAC rejista atu hapara sira ne’ebé la tuir kriteria/rekizitu sira
  • Xefe Suku balun, mós iha komunikasaun diak ho rede servisu CAC atu fahe  dadus no informsaun sira laloos ka indisius ba krime relevante sira ba falsifikasaun;
  • Liuhusi numeru kontaktu ne’ebe CAC, PDHJ no IGE fó sai ba publiku,  CAC simu informasaun husi publiku liuhusi telefone, SMS no WA mais-de 50 keisa/informasaun mak tama ba CAC;

Rekomendasaun:

  1. Husu ba komunidade/benifisiairu atu kumpri regra distansiamentu sosial, uza maskre no kumpri protokolu relevante sira ba prevensaun Covid 19;
  2. Husu ba komunidade/benfisiariu sira ne’ebe tuir loloos la priense kriteria atu iha direitu ba apoiu agregadu familiar ne’e hodi la simu apoiu monetartariu ne’e;
  3. Husu ba autoridade lokal sira hodi servisu ho integridade no evita fasilita membro família no falsifika dadus uma kain tanba ita boot sira bele hasoru krime abuzu poder, falsifikasaun no administrasaun denoza no krime sira seluk
  4. Husu ba ministério relevante sira atu hadia baze-de-dadus atu prevene situasaun hanesan iha futuru, tanba baze-de-dadus atual hatudu problema serius no hamosu prejuízo signifikativu ba estadu;
  5. Husu ba xefe aldea no suku sira atu hapara kobransa desnesesariu sira tanba ida-ne’e kontra lei no prosedimenus sira kona-ba apoiu monetariu agregadus familiar sira;

Kontributor sira:

1. FONGTIL, Ekipa CAC, membru rede Defensor Direito Umanus, no individu balun;

2. Grupu Espesifiku sira; Movimento estudante no Klibur Foinsae Humanitariu (KFH)

3. Asosiasaun Estudante Munisipiu Liquica no CNJTL Munisipiu Liquica

4. Judicial System Monitoring Program (JSMP);

5. Mensajem individual husi WA no FB/messenger 

Resposavel masimu sira;

  1. Jesuina Maria Ferreira Gomes, MPA – Provedora,
  2. Dr. Sergio de Jesus F. Hornai, Komisariu CAC,
  3. Prof. Faustino Cardoso Prezidente CFP,
  4. Dr. Francisco de Carvalho Inspector Geral do Estado (IGE),

Dili, 15 Juñu 2020

Previous postTimor-Leste’s Request on Technical Assistant at 1st Resumed 10th Session of the Implementation Review Group 2 – 4 September 2019 Vienna International Centre Next postPublikasaun Rezultadu Fínal ba vaga ho pozisaun Konsultor/Asesor atu elabora Relatoriu auto-avaliasaun ba implementasaun Konvensaun Nasoens Unidas iha Timor-Leste. referénsia 01/CAC/VI/2020

Popular

Rezultadu Monitorizasaun ho nia Deskobrementu Sira ba Semana Dahuluk Pagamento ba Apoiu Monetariu Agregadu Familiares (9-13 Juñu 2020)