Dili – Komisariu Adjuntu Comissão Anti-Corrupção (CAC) Manuel Bucar horseik loron Kinta-feira (23/2) ofisialmente loke formasaun kona-ba “Economic and Financial Crime” ba investigador CAC sira liu ema nain 20 durante loron rua nian laran. Formasaun ne’e finansia husi United Nations Office on Drugs and Crimes (UNODC) iha Hotel Timor Dili no lori husi matenek nain UNODC nian, Antonio de Vivo.

Objetivu husi formasaun ne’e atu hasae kapasidade investigador CAC nian atu analisa krimi fonanseira ne’ebé akontese iha Timor-Leste (TL). Formasaun loron rua ne’e nudar parte implementasaun MoU entre UNODC-CAC ne’ebé formaliza iha tinan 2014 liu ba, prezensa UNODC iha TL atu suporta ajensia supremasaun lei nian hanesan CAC hodi oferese treinamentu asistensia tekniku no programa hasae kapasidade proposionadu ba instituisaun ida ne’e.

Komisariu Adjuntu Bucar iha nian intervensaun hamenon ba EAK sira atu aproveita oportunidade formasaun ne’e hodi hakbiit sira nian kapasidade no horizonte. Investigador sira tenki uza kada oportunidade formasaun sira hetan tantu iha laran no mos iha rai liur.

“Hau espera formasaun durante loron rua ne’e bele tulun investigador halao imi nian servisu no  hafoun fila fali buat ne’ebé estuda tiha ona iha Timor no mos iha liur,” katak Komisau Adjuntu Bucar.

Formasaun durante loron rua nian laran ne’e nudar kontinuasaun suporta husi UNODC, iha tinan rua nian laran ba kotuk UNODC fornese ona treinamentu iha area investigasaun, interogasaun, money laundry, computer forensic no digital evidence no seluk-seluk tan. (*)